KNR qineqqusaarnerup nalaani Siumumit sioorasaarneqarpoq
Siumup partiaata siunnersortaata allakkamini KNR-ip aallakaatitaani aalajangersimasumi naalakkersuinermik suliallit IA-meersut marluk sivisuumik oqaaseqartinneqarnerat pillugu KNR-i isornartorsiorpaa.
Ilaatigut ima allappoq:
- Tamanut erseqqissumik iliuuseqanngikkussi Kalaallit Nunaata Radioata tamatigoortussaaneranik tunngavilinnik aallakaatitassaanik aaqqissuisarnersi artorsimanerissi nalilertariaqassavarput, sunalu tamaat sakkugalugu iliuuseqarnissarput ilimagisariaqassavarsi.
Tamanna ilutigalugu Siumup partiillu allat qineqqusaarnermut atatillugu killilersorneqanngitsumik aallakaatitassiornissartik, Siumup partiiata siunnersortaata piumasaraa.
KNR-ip pisortaata Ivalo Egedep taamaammat Siumup siulittaasua Hans Enoksen ataatsimeeqatigissallugu qaaqquaa allakkallu tunuartinneqarnissaat piumasaralugu.
Hans Enoksenip allakkat taama oqaasertalerneqarsimanerat ataatsimiinnermi ajuusarutigaa. Tamatuma kingorna Siumup nalinginnaasumik maalaarutaa - sioorasaarutitaqanngitsoq - KNR-ip tiguaa.
Pisortaq Ivalo Egede oqaaseqarpoq:
- Taamani isumaqatigiissuteqarnikkut suliaq inernilerparput, KNR-immi qineqqusaarnermut akulerutinneqarnissaa kissaatiginnginnatsigu. Pisorli maanna uterfigineqarpoq, tassami inatsisileritooq pisoq pillugu maanna allagaatinik takunnikkusulluni piumasaqarmat, allakkallu assilineri pisimallugit.
Ivalo Egede nangilluni oqarpoq:
- KNR-ip iliuuseqaqquneqarluni sioorasaarneqarsinnaannginnera pisup takutiinnarpaa. KNR tamatigoortumik suliaqarniartuuvoq, tamatigoornerli aallakaatitami ataasiinnarmi anguneqarsinnaanngilaq. Aallakaatitat tamarmiusut aallaavigalugit tamatigoortuuneq nalilerneqartussaavoq.
KNR-imi pisortaq tamanna pillugu allamik oqaaseqarusunngitsoq, KNR-ip tusagassiortunut nalunaarutaani atuarneqarsinnaavoq.
Hans Enoksen, pisup nalaani Siumumi siulittaassuusoq, allakkap nassiunnera sioqqullugu ilisimatinneqarsimanani oqarpoq.
- KNR-ip pisortaanit saaffigineqarama taamatut allattoqarsimasoq aatsaat paasivara. Allakkat pillugit Isak Olsen oqaloqatiginikuuarput. Allakkat uannit akuerineqaqqaaratik nassiunneqarput, taamatut allattoqassappat akuereqqaartussaagaluarpakka. Suliaq inerneqareernikuuvoq, annerusumik oqaaseqarfiginianngilara. Hans Enoksen oqarpoq.
