KNR pisortartaassaaq

Søren Lennert Mortensen novembarip 15-ianni aallartissaaq, KNR-ilu ullutsinnut naleqquttungorsarniarlugu aamma naammassisaqarfiulluartungortinniarlugu ukiuni pingasuni sulinissaminut piffissaqarpoq.

Siulersuisut siulittaasuata Hans Peter Poulsenip oqaatigaa, Søren Lennert Mortensen KNR-ip nutaalianngortinniarnissaanut naleqqulluinnartuusoq.

- KNR piffissami qaangiuttumi maannakkullumi ajornartorsiuteqartarluni ingerlasimasoq oqassaguma isertuussanik anitaqarnavianngilanga. Sulliviup sullivittut inissisimaffia aningaasaqarnerullu tungaatigut annertuunik unammilligassaqarsimavoq. KNR tassaavoq tusagassiornikkut ingerlatsinerup silarsuaani imaannaanngeqisumi unammillerfiulluartumilu inissisimasoq.

Taamaammat atorfinitsitsinitsinni nunatsinnut attuumasunik pikkorilluinnarluni

piginnaassuseqarluarlunilu siuttuusinnaasumik pingaartillugu nassaarniarsimavugut, taamatullu siunissaq tunaartaralugu KNR-mik ingerlatsisinnaasumik, KNR-ip siulersuisuini siulittaasoq Hans Peter Poulsen oqarpoq.

Pisortartaaq Sisimiuneersoq isumaqarpoq, pissanganartumik unammilligassaqalerluni:

- Kikkut tamarmik KNR oqaluuseraat, ikittunnaalli iliuuseqarput. Tusagassiuuteqarneq allanngoriartupiloorpoq, Nunatsinniinnaanngitsoq aammali nunarsuarmili tamarmi. KNR-ip nunarsuarmi pikkorinnerpaaffigisassaa nassaariniassavarput, sinnerilu allanut suliaritillugit, Søren Lennert Mortensen oqarpoq.

Taassuma sulisut, pisortaqatigiit, siulersuisut piginnittullu qanimut oqaloqatiginissaat qilanaaraa.