KNR naatsorsuutimigut sinneqartooruteqartoq

KNR-ip siulersuisuisa naatsorsuutit 2013-imeersut saqqummiuppaat, taakkunani takuneqarsinnaavoq ingerlatsinermut aningaasartuutit 5,9 millioner koruunik sinneqartoorfiusut, ukiumi siuliani 2,2 millioner koruuniusimallutik.
KNR
Allattoq Hagen Højer Christensen
juunip 06-at 2014 04:57

Nammineq aningaasaatimigut amigartoorutai 10 millioner koruuninik appartinneqarsimapput - 2012-imi 19,5 millioner koruunioriarlutik 2013-imi  9,7 millioner koruuninngorsimallutik. KNR-ip aqutsisuisa naatsorsuutigaat suliffeqarfiup nammineq aningaasaatai 2016-imi isumannarunnaarumaartut.

KNR-imi siulersuisut isumaat naapertorlugu angusimasat naammaginartutut isigineqarput, minnerunngitsumik suliffeqarfiup akiliisinnaassuseqarnera aaqqiivigineqarsimammat.

- Aningaasatigut aqutsineq eqqarsaatigalugu sipaarniutissatut siunnersuutaasimasut ajunngitsumik sunniuteqarsimapput. Matumanissaaq  ukiup ingerlanerani sulisut procentinik arfineq pingasunik ikililerneqarsimanerat malunniuteqartoq, siulersuisut siulittaasuat Hans Peter Poulsen oqarpoq.

KNR-ip pisortaa Søren Lennert Mortensen oqarpoq, qaammatip matuma naalernerani nutaamik aaqqissuusseqqinnissaq,  suliniutissanullu allanut tunngassuteqartut siulersuisunit akuerineqarumaartut naatsorsuutigigitsik. Nutaamik aaqqissueqqinnissat iliuuseqalernissallu aallaavigalugit KNR nutarteriffigineqassaaq, matumanilu suliarisartakkat tamarmik eqqarsaatigineqarput.

Tusarnaartartugut, isiginnaartartugut aammalu web-imik atuisartugut ukiassamut qilanaalereersinnaapput, Søren Lennert Mortensen naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq