KNR-ip siulersuisui pillugit isumaqatigiissutissarsisut

KNR-ip siulersuisui ilinniarsimasunik inuttalersorneqarnissaat sulissutigiinnarneqassaaq, siulersuisunulli ilaasortat tallimaasut ilaat sisamat Naalakkersuisunit toqqarneqartassanngillat. Ataatsimiititaliaq isumaqatigiissoq kultureqarnermut naalakkersuisumut Nick Nielsenimut taama inassuteqaateqarpoq.

Ilaasortanit tallimaasunit sisamat Naalakkersuisuinit toqqarneqartarnissaat ataaserlu sulisunit toqqarneqartarnissaa siunnersuummi siullermi siunniunneqaraluarpoq. Siunnersuut nutaaq malillugu, Naalakkersuisut siulittaasussamik ilaasortassamillu ataatsimik inassuteqartassapput. Nutaatullu aamma taaneqarsinnaavoq, ilaasortaq ataaseq ilisimatusarfimmit inassuteqartoqarneratigut ataaserlu kulturikkut pinngorartitsisut kattuffiannit inassuteqartoqarneratigut toqqarneqartassalissammata.

Siammasissumillu isumaqatigiittoqarsinnaasimanera Nick Nielsenip nuannaarutigaa, kikkullu siulersuisunut ilaasortanngornissaat pingaarnerpaajunani piukkunnartunik ilaasortanngortitsisoqartarnissaa pingaarnerpaajunerarpaa.

- Siulersuisut ilinniarsimasuunissaasa anguneqarnissaa pingaarnerpaajuvoq, naalakkersuisoq oqarpoq.

Aaqqissuussinermi nutaami piginnaasassanut nassuiaatissat sisamat suliarineqarsimapput, piginnaasanut misilittakkanullu erseqqissunik piumasaqaasersuisoqarsimalluni. Taakkulu naapertorlugit ilaasortassanik toqqaasoqartassaaq.

Ilaasortaq ataaseq aningaasaqarnermut ilisimasaqartuussaaq, ataaseq sulisoqarnermut pilersaarusiornermullu, alla nunani tamalaani tusagassiuutit pillugit piginnaasaqarluni, ilaasortarlu ataaseq kulturikkut eqqumiitsuliornikkullu piginnaasaqassalluni.

Oqaaseqartartut ilaasa oqaatigisimavaat, taamatut piumasaqaasersuisoqarneratigut ataasiinnarmik oqaasillit siulersuisunut ilaasortanngornissaannik ajornakusoortitsilissasoq, oqaatsinulli piumasaqaateqartoqannginnera erseqqissaatigineqarpoq.