KNR-ip Qanoruup kinguaattoornera ajuusaarutigaa
Suliffimmi suliat ingerlaneri tamarmik sulinermilu atortut tamarmik allanngorterneqarput taamaammat suliarujussuullunilu naammassiuminaappoq.
- Sulisut tamarmik maanna naammassiniarlutik unissanatik sulipput. Assigiinngitsorpassuit suliarineqartussaallutillu ilinniarneqartussaapput. Taamaakkaluartorli innuttaasut nutaarsiassiiffiginiarlugit, allanngortiterinitsinni malunnartitsinaveersaarluta sapinngisatsinnik ullut tamaasa misiliisarpugut. Ajutuulaartarnerli avaqqunneqarsinnaanngilaq, ippassarlu ilaatigut tamanna pivoq, nutaarsiassaqartitsinermi pisortaq, Mikkel Bjarnø Lund oqarpoq.
KNR-ip atortut nutaat ikkussoreerpai, maannalu taakku ilinniarlugit, misilerarlugit iluarsartuunneqaleruttorput. Taamaammat KNR-ip aallakaatittakkat tamarmik ulluni tulliuttuni piffissaq eqqorlugu aallakaatinneqartarnissai neriorsuutigisinnaanngilai.
- Sapaatip akunnerani matumani atortut misilerarlugit ingerlanerliortut iluarsartuuppagut. Sapaatip akunnerata tulliani atortunut nutaanik atuilivissaagut. Aporfigisassallu annerpaartaat qaangersimalissallutigit, nutaarsiassaqartitsinermi pisortaq oqarpoq.
KNR-ip atortorissaarutai nungullavissimaput. Taarsersuinissaq taamaammat sivisuumik utaqqineqarsimasoq pisariaqavissimavoq.
- Atortorisaarutit iluarsineqarsinnaajunnaarlutik sequmissinnaanissaat ukiuni arlalissuarni qanissimavoq. Aallakaatitsinermi nutaarsiassalerinermi nutaanik nutaaliaasunillu maanna atortutaarpugut, aamma suleriaatsinik siornali iluarsaaqqinnitsinnik ikorfartuisinnaasunik. Iluarsaaqqinneq nutaarsiassanik avitseqatigiiffiusunngornermik nittartakkakkullu saqqummiusseqqartarnissamik imaqarpoq. Atortorissaarutit nutaat atorlualerunik sulinitsinnut iluaqutaassapput, sorpassuit torrallataanerussapput piuminarnerullutillu, Mikkel Bjarnø Lund oqarpoq.