KNR-ip nittartagaa politiinut suliassanngortinneqarpoq

Atuartartut ilaata allagaa pissutigalugu knr-ip nittartagaa politiinut suliassanngortinneqarpoq. Atuartartut ilaata allagaani Inatsisartunut ilaasortaq aqqatigut taallugu Inatsisartut maanna ataatsimiinneranni taasisitsinermi malittarisassanik unioqqutitsisimanerarlugu pisuutinneqarpoq. Politiinut suliassanngortitsisoqarsimanera politimesterip tulliata Morten Nielsenip Radioaviisimut uppernarsarpaa.
novembarip 12-at 2008 05:25

KNR-ip nittartagaani akisussaalluni aaqqissuisup Martin Chemnitzip Radioaviisimut erseqqissarpaa, KNR-ip oqallittarfiani oqaatigineqartut ilumoornersut ilumuunnginnersulluunniit misissornissaat KNR-ip suliassarinngikkaa.

- KNR-ip nittartagaani oqallinnermi ileqqorissaarnissamut tunngasunik malitassaqarpugut, tamannali isumaqatigiinngissutinut atuutinngilaq. Naqisimaneqarani oqaaseqarsinnaatitaanerup aamma nakkutilliinerup sianigeqqissaarnissaat pingaartitaraarput, Martin Chemnitz oqarpoq erseqqissarlugulu knr-ip nittartagaani oqallinnerni isummat knr-ip isumaatut isigineqassanngitsut.

Inatsisartut siulittaasuata Ruth Heilmannip kikkut taasisitsinermi malittarisassanik unioqqutitsisimanerannik tusatsiakkat tusagassiuutinut nalunaaruteqarluni akerlilerpai.

KNR-ip nittartagaani oqallittarfimmi malittarisassat knr.gl-imi takuneqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq