KNR KNR-ip inuusuttunut radiukkut kanalimik nutaamik sulissuteqarnini ingerlatiinnassavaa
– Siulersuisut qangalili KNR-ip siunissamut iliuusissatut pilersaarutaa akuersissutigereerpaat aamma tassunga ilanngullugu radiukkut kanalimik nutaamik pilersitsinissaq, taanna Nunatsinni inuusuttunut sammisuussasoq taakkumi ullumikkut naammattumik sullinneqanngillat maannakkut radiukkut kanali atorneqartoq eqqarsaatigalugu, Siulersuisuni siulittaasoq Nukaraq Eugenius oqarpoq, nangillunilu, - uagutsinnut siulersuisuniittunut pingaaruteqarpoq KNR-ip innuttaasunik sullissinissaminik pisussaaffimminik tamakkiisumik naammassinninnissaa inuttaasunullu tamanut atassuteqarnissaa. Radiukkut kanali nutaaq aqqutigalugu inuusuttut innuttaasut suli amerlanerusut angusinnaavavut.
Radiukkut kanali nuna tamakkerlugu internet aqqutigalugu naalaarneqarsinnaavoq imaluunniit smartphones atorlugit APP ineriartortinneqarsimasoq aqqutigalugu. KNR Namminersorlutik Oqartussanut qinnuteqaatigaa kanalip DVB-T båndimut ilanngutsinneqarsinnaanera pillugu, taanna tassaavoq fjernsynikkut radio aamma tv kanalit akeqanngitsut. Taamatuttaaq nalilersorparput nuna tamakkerlugu FM-ikkut aallakaatitsisinnaalernissaq.
– Radiukkut kanalimi nutaami ilaassapput aallakaatitassiat nutaat, nalunaaquttap akunneranut nutaarsiassat aamma soorunami nipilersukkanik ulikkaassaaq, tamakkumi inuusuttut tusarnaarusuttarmatigik. Naatsorsuutigaarput aallakaatitassiat nutaat marsip aallartinnerani aallartikkumaartut, KNR-ip pisortaa Søren Lennert Mortensen oqarpoq, nangillunilu, - inuusuttut kanalimik annertuumik soqutiginninnerat aamma assut qilanaarnerat nuannaarutigaarput, aamma pilersaarutit tamakku tamaasa naammassinissaannut qilanaarpugut.
– Soorunami uggornaraluarpoq aallartinniakkatsinnik pitsaanngitsumik oqallisiginninneq, kisianni maannakkut isumaqatigiippugut siunissamut isiginiarluta aamma sapinngisarput tamakkerlugu iliussaagut suliniutip iluatsinnissaanut, Siulersuisuni siulittaasoq oqarpoq naggasiillunilu, - aallakaatitsisarnitta siammasinnerulernissaanut kissaateqarnitsinnut taamaallaat tunngaviuvoq annertunerusumik aamma pitsaanerusumik iliuuseqarusunneq – aammattaaq inuusuttunut. Tassaapput ilungersorluta angorusutatta ilaat.
