KNR-ip immikkoortortaqarfii soraarsitsiortornernit eqqorneqarnerpaapput
KNR Avannaa Kujataalu eqqorneqarnerpaapput, KNR-illu innuttaasunik kiffartuussinissamik pisussaaffeqarnerminik naammassinnissinnaanera taamaasilluni ulorianartorsiulernersoq KNR-ip pisortaa Ivalo Egede aperaarput, akivorlu:
- Naluara taama oqartoqarsinnaanersoq, kisianni inuiaqatigiinni soorunami sipaartoqarpoq, KNR-imiileramalu takusinnaavara aaqqissuisoqarfiit ikittuinnarnik sulisoqartut. Iluamik kiffartuussissagutta sulisunik ikililerisoqaqqittoqarsinnaanngitsoq isumaqarpunga. Nammakkavut naammareeqaat, KNR-ip pisortaa Ivalo Egede oqarpoq.
Sulisut arfineq-marluk soraarsitaapput, soraarsitsinermullu tunuliaqutaasut Ivalo Egedep nassuiarpai:
- Piviusoq unaavoq: Aningaasat tunniunneqartartut ikiliartorput, arlalissuartigut sipaarfigineqallattaavugut. Taava aningaasartuutit misissoqqissaarluartarlutigit sipaartuartarluta ilinniartitaanernut, angalasarnernut, sineriak tamakkerlugu angalasarusukkaluarluta akissaqartinngilarput. Taamaattumik sulisut ilai ajoraluartumik soraarsittariaqarsimavagut, Ivalo Egede oqarpoq.
Nuummi TV-teknikeri ataaseq, radiomilu teknikeri ataaseq, toqqorsivimmilu sulisoq ataaseq, Qanoruumilu sulisoq ataaseq soraarsitaapput.
Nunalli immikkoortui soraarsitsinernit eqqorneqarnerpaapput.
KNR Kujataani sulisut marluk soraarsinneqarput, KNR Avannaanilu Ilulissani sulisoq ataaseq soraarsinneqarluni. Tassani sulisut sisamat maanna radiolerillutillu tv-lerissapput.
Avannaani Kujataanilu soraarsitsiortornerit eqqarsaatigalugit KNR-ip innuttaasunik kiffartuussinissamik pisussaaffeqarnerminik naammassinnissinnaanera qinikkat KNR-imut aningaasaliiniarnerminni eqqarsaatigisariaqaraat, Svend Møllerip, KNR-ip siulersuisuini ilaasortap, Kanukokamit isiginnaartartullu tusarnaartartullu sinnerlugit toqqarneqarsimasup oqaatigaa:
- Tamatigoortumik tusagassiuinissaq qaammarsaanissarlu KNR-ip akisussaaffigaa. Inatsisitigut peqqussutigoortumik tamanna allassimavoq. Inuiaqatigiinnut sullissivimmik tusagassiuteqarnermik ingerlatsineq akeqarpoq, aamma ilaannikkullu akisungaatsiarsinnaalluni. Aningaasaliisartut tamanna paasisariaqarpaat. KNR-imut ukiuni kingullerni aningaasaliissutit naammaqqaannavinngikkaangamik amigartuartarsimasut naluneqanngilaq. Taamaattumik neriuppunga politikerit aalajangiisartut tamanna aamma isumaliutigilluaqqissagaat KNR-imut ukiuni tulliuttuni aningaasaliinialerunik, KNR-ip siulersuisuini ilaasortaq Svend Møller oqarpoq.
Naak KNR-ip oqaluttuarisaanerani aatsaat taama amerlatigisunik soraarsitsisoqaraluartoq, ulluinnarni aqutsisut eqqarsaatigilluarneqarsimasumik iliuuseqartut, Svend Møllerip oqaatigaa:
- Soorlu siulersuisuni oqaatigigiga ajuusaarnartuaannarpoq taamatut soraarsitsisoqartariaqaleraangat, pingaartumik KNR-imi sulisunik ikililerineq eqqarsaatigalugu. Kisianni maluginiarpara ulluinnarni ingerlatsisut nalilersuilluaqqaarnermikkut eqqarsaatiginnilluaqqaarnermikkullu siunniussimagaat. Tamatumuunakkullu tatigaakka, KNR-ip siulersuisuini ilaasortaq Svend Møller oqarpoq.
KNR 61,6 millionit koruunit missaannik ukioq manna ukiunullu tulliuttunut aningaasaliiffigineqarpoq.
