KNR-ip 2014-mi ukiup affaani siullermi aallakaatitassianik suliariumannittussarsiornera.

KNR TV aallakaatitassiamut nangeqattaartumut ’Nunatsinnit’-mut aallakaatitassianik pissarserusuppoq. Saaffiginiakkat tassaapput 20-nit 45-nut ukiullit. Aallakaatitassiaq ataaseq min. 27-nik sivisussuseqassaaq. Ataasiakkaanik aallakaatitassiornissamut periarfissaqarpoq, aallakaatitassialli arlallit pillugit suleqatigiinnissamik aamma isumaqatigiissuteqartoqarsinnaalluni.

KNR TV aamma meeqqanut nuannersunik ilikkagaqarfiulluartunillu aliikkutassianik nangeqattaartunik pissarserusuppoq. Saaffiginiakkat tassaapput meeqqat pingasunit arfinilinnut ukiullit. Aallakaatitassiat amerlassusaannut, aallakaatitassiortup avataaneersup aallakaatitassiassatut siunnersuutigisaa apeqqutaassaaq.

Pisortap tullia TV-milu aallakaatitassiornermut pisortaq Jan Berg oqarpoq:

- KNR-ip Kalaallit Nunaanni aallakaatitassiortut avataaneersut siuarsaavigerusuppai. Aallakaatitassiortarnerput allanngortiternikuuarput, taamaalilluta maanna 2014-mi ukiup aaffaani siullermi 1,5 mio. kr.-it nalingi missaannut aallakaatitassianik suliariumannittussarsiorsinnaalerluta.

Aallakaatitassiassatut siunnersuut aallakaatitassiassap imarisaanik sukumiisumik nassuiaaserneqarsimassaaq, piffissamut pilersaarusioreerlugu missingersuusiorfigereerlugulu.

KNR TV-p 2014-imut aallakaatitassianik suliariumannittussarsiornera aallakaatitassiortunullu avataaneersunut formatinut piumasaqaatai nittartakkatsinni uani, nassaarineqarsinnaapput.

KNR Radiop aallakaatitassianik suliariumannittussarsiornera periarfissami piaarnerpaami avammut nalunaarutigineqassaaq.