KNR-imi sulisut Kultooreqarnermut naalakkersuisumut Mimi Karlsenimut allagaqaat
Ukiut kingulliit pingasut ingerlanerini KNR-imi sulisut pingasoriarlutik ikilisaavigineqartariaqartarsimapput. 2009-mi 109-nik KNR-i sulisoqareerluni maanna soraarsitsisoqarpat 83-iinnanngussapput. Tassa KNR-imi sulisut akunnaallisarlugu katillugit 25 procentinik ikileriartussanngorput, asulu KNR-ip innuttaasunut sullissinissamut pisussaaffii annikilleriarsimanngitsut.
Allatulli ajornarmat KNR-ip sulisuisa sapinngisaq tamaat atorlugu tusagassiorneq pitsaasoq naapertuuttorlu ullut tamarluinnaasa ingerlanniartuarsimavaat, aamma kultooreqarnermut- aliikkusersuinermullu immikkoortortaqarfiup tungaaniit. Sulisulli ikiliartuinnartillugit aallakaatitassiat pitsaassusaata tupinnanngitsumik appariaateqarsimaneranik kinguneqartariaqalersimavoq, sulilu ajorseriassalluni.
Tassa tusagassiortutta sukumiisumik misissuillutik isornartoqarsinnaasunillu tusagassiisinnaanerat uggornaraluaqisumik ajorsiartuinnarpoq, sualummik Nunatsinni tamat naalakkersueqataasinnaanerat taama nutaajutigitillugu uggorisariaqarluni. Aamma meerartatsinnut immikkoortortaqarfitta atorunnaarsinneqarnerata Nunatsinni innuttatta nukarliit tusagassiutit innuttaasunut sullissinermut paasinnittaasiisa akornuserneqarneranik kinguneqarsinnaalluarpoq. Tamakkuinnaanngillalli, sineriaammi sinnerani innuttaasut tusagassiutigut sullinneqarnerat pitsaavallaanngereeqisoq aamma ajorseriaqqittussanngorpoq.
Aamma Inatsisartuni inatsisissatut siunnersuutit eqqartugassat sukumiisumik misissorsinnaajunnaassavagut Naalakkersuisullu inatsisiliaat pitsaasumik KNR-ip tungaaniit sammineqarsinnaajunnaassallutik. Pissutsit nutaat politikerinut iluassangaluaqisut inuinnaat naalakkersueqataasinnaanerannut akornusiissaqaaq, innuttaasullu nunatta inatsisartuinit inatsisiliuunneqartartut pitsaasumik paasissutissinneqartarneri oqaluttuaannanngussallutik. Tassa tamat isummersorsinnaatitaanerat ulorianartorsiulerpoq, aali tamat naalakkersueqataasinnaatitaanerannik tamatta illersuisuusussaagaluartugut.
Tamatuma saniatigut KNR-imi aqutsisutta aaqqiissutissanik siunnersuutinik politikerinut tamakkuninnga samminnittunut nittarsaasisarsimanerisa iluatsinngisaannarsimaneri sulisut tungaaniit eqqumiiginartipparput. Kingullermimmi qineqqusaartoqarmat tusagassiutit iluarsiivigineqarnissaanik oqaaserpassuit kusanartut qineqqusaarutigineqartut killeqanngiusarput. Ilaatigummi inuiaqatigiit akornanni ammanerulernissamik erseqqarinerulernissamillu oqarluartaarnerit qineqqusaarnermi imaaginnavikkaluarput, qinersinerli qaangiunniariarmat pilluaqqusillutillu oqalugiaqattaarnerit qaangiummata neriorsuutaasimagaluit akerlerluinnaanik pisoqarpoq. Taamaammat KNR-imi siulersuisut Nunatsinnilu politikerit tungaanniit KNR-ip aningaasaqarniarnerata iluarsiivigineqarnissaa kaammattuutigaarput, aatsaammi taamaasiortoqarsinnaappat KNR-imiit innuttaasunut tunniussinnaasavut pitsanngorsinnaassammata.
Tassa Nunatta inatsisartuisa qinersisoqannginnerani KNR-imut neriorsuutaasa akerlerluinnaanik iliuuseqartarnerat misigipiloreeqaarput. Ilami KNR-ip innuttaasunut sullissinissamik pisussaaffii naammassisinnaajumallugit siulersuisut inatsisartunut saaffiginnikkaangata angiluttortuartarsimapput, asulu pitsaasumik isornartorsiuerpalaartumillu tusagassiorniaraanni akikitsuinnaannginnera inatsisartut naalakkersuisullu tungaanniit ataasinnguamilluunniit paasineqarsimarpasinnani..
Ilami naak sulisut maanna ikilereeraluaqisut KNR-imi atortorissaarutit nungullarsimaqisut qanganitsersimaqisullu nutarsarneqarnissaat suli akissaqartinneqanngilluinnarpoq, siunissamilu KNR-imi soraarsitsisoqaqqinnginnissaa qulakkeerneqarani. Uagummi KNR-imi sulisuusugut aningaasat amigartut atorlugit aallakaatitassiorniarsariuarpugut, taamaammallu tupinnanngitsumik uagut sulisuusugut politikerit tungaanniit tullaatarineqartutut misinnarluni. Ilami ilungersoraluallaratta suleqativut aqqanillit soraarsitaasariaqalernerinik kinguneqaannarsimammat taamatut misigisimavugut.
Taamaammat Inatsisartuni ilaasortat, minnerunngitsumillu Naalakkersuisoq Mimi Karlsen imatut kaammattorusuppavut: Innuttaasunik sullissinissamut pisussaaffiit sinaakkutissaat pitsaasut, siunissamullu isumannaarneqarsimasut qulakkeersigit, taamaasiorussimi Kalaallit Nunaanni innuttaasut pitsaanerpaamik sullinneqarsinnaaniassammata.
