KNR-imi siulersuisut nutaamik siulittaasortaarput
Peter Jensen pitsaasumik siulittaasuujumaartoq qularinagu naalakkersuisuni ilaasortaq Mimi Karlsen oqaaseqarpoq.
– Suliaqarfigiligassaminut ilisimasaqarluartuunera naalakkersuisut pingaartissimavaat. Peter Jensen TV-mik suliaqarnermigut pitsaassutsimut piumasaqaatit sukumiisumik ilisimasaqarfigilersimavai piffissami matumani radiomi, tv-mi internettimilu piumasaqaatit annertusiartuaartillugit KNR-imi pisortat suliat pillugit siulersuisunik pikkorissunik oqaloqateqartarsinnaanissaat tamatumuuna qulakkeerneqarpoq.
Siulersuisuni siulittaasutut toqqarneqartoq Peter Jensen, 47-inik ukioqartoq Inuk Mediami, nammineq pigisamini, ulluinnarni pisortatut atorfeqarpoq tv-milu suliani pillugit arlaleriarluni nunat tamat akissarsisitsissutigisartagaannik akissarsisinneqartarsimalluni.
Peter Jensen oqarpoq:
- Toqqagaanera nuannaarutigeqaara, KNR-illu pitsaasumik ineriartortinneqarnerata qulakkeernissaanut peqataasinnaassallunga neriuppunga, tamanut sullissiviup nutaaliaasumik sullissilernissaa, nunatta ataqatigiinnerulernissaa nunarsuarmilu tusaamaneqarnerulernissaa anguniarlugit.
Peter Jensen siulittaasutut sulilluni aallartereerpoq, KNR-illu siulersuisuisa ataatsimiinnerannut ullumi peqataarngaarluni, ataatsimiinnermilu tassani 2010-mit 2014 ilanngullugu periusissaq oqaluuserisassanut ilaavoq.