KNR-imi nutaarsiasseeriaatsit nutaat
Ullumikkummi KNR-imi immikkoortortaqarfiit pingasut ukuupput: Qanorooq, Radioaviisi kiisalu KNR.gl. taakku immikkoortoqarfiit pingasuusut siunissami suleqatigiilluarnerulissapput immikkoortortaqarfinnilu immikkut ilisimasat atorluarnerisigut nutaasiasseeriaatsit pitsaanerusut atuisartutsinnut apuunneqarsinnaalissapput, tassa nutaarsiassaqartitsiviit arlaat atoraluaraanniluunniit apeqqutaassanani, KNR-ip nutaarsiassaqartitsiviani pisortaq Mikkel Bjarnø Lund oqarpoq.
- Aaqqissuisoqarfitsinni aaqqissuussaaneq siunissamut isigerpalaartumut maanna alloriarpugut. Tusagassiortuvummi silatuut pikkorissullu amerlaqaat, immikkoortortaqarfiillu amerlanerit atorneqartalernerisigut suli pikkorinnerulissallutik. Mikkel Bjarnø Lund oqarpoq.
Taamaasillutik Radioaviisimi Qanoruumilu sulisut susassaqarfiini susassareqatigiilissapput, tamatumalu kingunerisaanik tusagasseeriaaseq pitsaasoq tv-kkut, radiokkut web-ikkullu neqeroortutaalersinnaalissalluni.
- Taamaasilluta nutaarsiassaqartitsivik piffissamik malinnaasoq nutaarsiassanillu pitsaasunik tunniussisinnaasoq atuisartutta malugusuutigissagaat neriuutigaarput, tassa Qanorooq, Radio imaluunniit KNR.gl-iunersut apeqqutaajunnaassallutik.
Sapaatillu akunnerata tullia aallarnerfigalugu KNR-ip nutaarsiassaqartitsiviani web first-strategy atortinneqalissaaq, tassa KNR.gl-imi nutaarsiassat nutaajunerpaat saqqummiuteqqaarneqartalissallutik.
- Amerlanerujartuinnartut ullormut nutaarsiassat pikkunarnerpaartaat nittartagarput aqqutigalugu malinnaasalersimasut maluginiarparput, taamaammallu KNR.gl aqqutigalugu nutaarsiassanik suli amerlanerusunik sukkanerusumillu saqqummiunneqartalernissaat atuisartutta naatsorsuutigissavaat, nutaarsiassaqartitsivimmi pisortaq, Mikkel Bjarnø Lund oqarpoq.