KNR KNR-imi juullimi ammartakkat nutaat
![](/sites/default/files/styles/image_934x467/public/article_images/julestjerne_0.jpg?itok=CIGuXvmJ)
Juullimi ammartagaq nutaaq “Serrat”
Decembarip aallaqqaataani radio ammarukku juullimi ammartakkami nutaami ilaqutariinnut naatsorsuussami “Serrammi” immikkoortoq siulleq qilanaaralugu tusarnaarsinnaavat, taanna Nunatta Isiginnaartitsisarfiani ilinniartunit sisamanit kiisalu isiginnaartitsisartunit marlunnit suliarineqarpoq. Taakku ataatsimut juullimi ammartagaq nuannersoq isumassarsiatsialaasorlu suliarisimavaat, tassani qanga pisimasut ullumikkut pisut akulerullugit tupinnartuliatut oqaluttuarineqarluni. Juullimi ammartakkami peqataasut isiginnaartitsisartut ilinniarfiata aqutsisuanit Makka Kleistimit ilitsersorneqarpoq.
Inersimasunut juulli
Naalaartartut inersimasuusut qilanaaralugu tusarnaarsinnaavat juullimi ammartagaq nutaaq Stephen Heilmannimit suliarineqartoq, tassani oqaluttuarisaanitsinni kingumut qiviarnerulluni, kristumiussutsip Nunatsinni inoqarfinnut tamanut qanoq siaruariartorsimanera sammineqarluni. Immikkoortuni 24-usuni oqaluttuarineqassapput kristumiussutsip aamma kujataani avannaanilu niuernerup akornanni qanoq ataqatigiittoqarneranik oqaluttuat, Thulep eqqaani 1909-mi siullerpaamik juullisiortoqarneranik oqaluttuaq pillugu, Rasmus Berthelsenip taalliaa ”Guuterput” pillugu oqaluttuaq, aamma sooq Hans Egedep tikinneraniit ukiut pingasut missiliorlugit aatsaat qaangiuttullu kalaaleq siulleq aatsaat kuisinnersoq.
Juullimi ammartagaq piviusunit aallaaveqartoq “3900 Nuuk” – Nuummiuviuneq qanoq paasisariaqarpa?
Danmarks Radiop P1-iani tusagassiortut Emil Rothstein aamma Mikkel Rønnau atuakkiortoq Niviaq Korneliussen peqatigalugu apeqqut tamanna saqqummiuppaat.
Danskisut oqaasertalimmi radiokkut juullimi ammartakkami nuummiuiuneq assigiinngitsunik 24-nik isiginnittaaseqartumik sammineqassaaq, immikkoortunilu tamani pinerit tamaasa innuttaasumit ataatsimooruterpassui, kisianni aammattaaq assigiinngissuterujussui, oqaluttuarineqartassapput.
Juullimi nuannarineqarluartartut allatut saqqummiullugit
KNR-imi nipilersukkanik nuannarineqarnerpaanik aallakaatitassiortartoq Hans Peter Bay juullimi erinarsuutinik 24-nik uagut tamatta nalunngilluakkatsinnik, taamaattorli allatut saqqummiullugit, sammisassavai.
Adadakodantip juullimut erinaatai
Meeqqat TV-kkut juullimi ammartagaq erinarsornermik imaqartussaq qilanaarisinnaavaat, tassani ammartakkat 24-t ammarneqassallutik, tamanilu juullimi erinarsuut nutaaq tusarnaarneqartassalluni. Erinarsortartup tusaamasap Randi Brobergip juullimi ammartagaq suliaraa, ullullu tamaasa erinarsornermik piginnaaneqarluartumik suli tusarsimanngisatsinnik pulaartoqartassalluni.
Nissikkut
Nissit Titsi, Nivi, Kaaka, Aka, Nissi, Nuka aamma qimmeq Nguujuk nuannarineqarluarlutik isiginnaarneqarsinnaassapputtaaq, qanga juullimi ammartagaq quianartortalik Nissikkut pillugit aallakaatitassiami. Nissikkut Silamiunit suliarineqarpoq siullerpaamillu 1985-imi aallakaatineqarluni.
Paasissutissat sukumiinerusut pissarsiarineqarsinnaapput uani; Masaana Egede, Radiomi pisortaq imaluunniit Niels Pavia Lynge, pilersaarusiornermi pisortaq npl@knr.gl oqarasuaat 36 15 00.