KNI sulisitsisunit ilaasortaajunnaarusuppoq
Niuertarfissuaq, KNI Nunatsinni sulisitsisut peqatigiiffiannut, GE-mut ilaasortaajunnaarsinnaalluarpoq. Taama ersaritsigisumik niuertarfissuup KNI-p siulittaasua, Niels Thomsen qisuariarpoq, Pilersuisoq illoqarfinni arlalinni niuertarfeqalersinnaanissaa pillugu oqallittoqareersorlu.
Namminersorlutik Oaartussanit pigineqartoq, Pilersuisoq illoqarfinni annerni qangatut niuertarfeqalerluni Pisiffimmut unammilertunngornissaanik, Nunaqavissut sulisitsisut kattuffiannit, NUSUKA-mit qanittukkut oqallissaarutigineqarpoq.
NUSUKA isornartorsiuivoq allallutik, Pisiffiup illoqarfinni annerni unammillerteqarani ingerlatsinera allanngortinneqartariaqartoq.
Namminneq PIlersuisoq tunivaat
Tamanna Nunatsinni sulisitsisut peqatigiiffiata, GE-p pisortaata, Brian Buus Pedersenip isornartorsiorpaa, Sermitsiaq.ag-mut oqarluni, KNI-p Pilersuisoq 2001-mi tuninerata kingorna, NUSUKA-mit siunnersuutigineqartoq kinguariarnertut taaneqarsinnaasoq.
- Namminersortut niuertarfiit kikkut tullinnguunnissartik annilaanngatigissavaat, Namminersorlutik Oqartussanit aningaasalersorneqartunit unammillerneqarnissaminnik, sulisitsisut peqatigiiffianni pisortaq, Brian Buus Pedersen isornartorsiuinermini Sermitsiaq.ag-mut oqarpoq.
Niels Thomsen puffassimaarpoq
Tamanna pillugu, KNI-p siulittaasua, Niels Thomsen qisuariarpoq erseqqissaatigalugu, sulisitsisut peqatigiiffiata pisortaa taama qisuariannginnermini, KNI-p siunissami qanoq ingerlatserusunneranik paasiniaaqqaarsimasariaqaraluartoq.
Niels Thomsenip aamma erseqqissaatigaa, sulisitsisut peqatigiiffiata Pisiffimmik illersuiniarnera ikkappallaartoq. Niels Thomsen aamma oqarpoq, GE-p taama isornartorsiuinermini isumaqalersitsisoq, KNI-p inuiaqatigiit aningaasaataat atorlugit tunuliaqutigalugillu Pisiffimmut Brugseninullu toqqaannartumik unammilertuusoq.
Taama oqareerluni, Niels Thomsen nangilluni aamma oqarpoq, KNI-p sulisitsisut peqatigiiffiannut, GE-mut ilaasortaanermut akiliuteqaqqinnginnissaa, Brian Buus Pedersenip naatsorsuutigisariaqaleraa.
