KNI siornatigutupajaaq ukiumut angusaqarluartoq

Suliffeqarfissuup KNI A/S-ip, pisiniarfiliuteqatigiiffimmik Pilersuisumik orsussanillu pilersuivimmik Polar Oil A/S-imik piginnittup, 2019-imi akileraannginnermi angusai 113 millionit koruuniupput, akileraareernermilu 76 millionit koruuniullutik. 

Suliffeqarfissuup ukiumoortumik naatsorsuutimik naaneranni nammineq pigisai 1.14 milliardit koruuninik naleqarput.

- Suliffeqarfissuup ukiuni arfineq-marlunni kingullerni angusaqarluartarnini attassinnaagini 113,3 millionit koruuninik akileraannginnermi angusaqarnermigut uppernarsarpaa. 2019-imi ukiumut angusai suliffeqarfissuup oqaluttuarisaanerani angusarissaarnerpaaffiinut sanilliunneqarsinnaapput, KNI-p pisortaanera Peter Grønvold Samuelsen allappoq.

Nutarterinissamut sinneqartooruteqartariaqartoq

KNI-llu angusai orsussanik nioqqutissanillu pilersuinermi illuutiminik nutarterinissaanut pingaaruteqarluinnartut, pisortaaneq erseqqissaavoq.

KNI tamatumunnga atatillugu 142 millionit koruunit missaannik piffissami 2019-2020-mi aningaasaliissuteqarpoq, ukiunilu tulliuttuni ukiut tamaasa 150 millionit koruuninik aningaasaliissuteqartassangalluni.

KNI-lu ukiumut angusaminit 20 millionit koruuninik piginnittuminut tunniussaqassasoq, Namminersorlutik Oqartussallu isumaqatigiipput.

Nunatta karsialu KNI-p nunaqarfinnut avinngarusimasunullu nioqqutissanik pilersuinermik attassinissaanut ukiuni arlaqartuni aningaasalersuivoq. Nunattali karsiata aningaasaliissutigisartagai ikiliartornikuupput, siornalu aningaasaliissutai 18 millionit koruuniullutik. Taakkua ukiut pingasut matuma siorna aningaasaliissutaata affarigai, KNI allappoq.