KNI-p ingerlariaqqinnissaa eqqarsaatigileruttorpaat
Unammilleqatigiinnermut ataatsimiititaliap aalajangiinera KNI-mut ukiumut aningaasanik 300 millionit koruunit missaannik annaasaqaataasussaassaaq. KNI ukiumut 2,2 milliardit koruunit missaannik kaaviiaartitaqartarpoq.
Taama aalajangiineq annertuumik sunniuteqartussaasoq, KNI-p pisortaanerata, Søren Lennert Mortensenip oqaatigaa.
Isumaqatigiissusiornikkut kisermaassilluni tuniniaanerup ukiuni 22-ni ingerlalluarsimasup unitsinneqarnera, pisortaanerup aamma ugguarnartoqartippaa, naak immiaaqqanik aamma imeruersaatinik sukkulinnik tuniniaaneq, taamatullu puiaasat puuinik utertitsisarneq ajunngitsumik ingerlasimagaluartutut oqaatigalugu.
Kisiannili tassa maanna KNI-p pisortaanerisa pisoq eqqarsaatigilluartussanngorpaat.
Unammilleqatigiinermut ataatsimiititaliap aalajangigaa, septembarip aallaqqaataani ukioq manna atuutilersussaq, eqqartuussivitsigoorlugu atorunnaarseriaraluassanerlugu KNI-p pisortaanerisa eqqarsaatigaat.
- Annertukkuutaanik nioqquteqarneq aningaasarsiorfigiunnaartussaavarput. Allatullu aningaasarsiulernissaq eqqarsaatigilertussaassavarput, taamaaliulernissarpullu ajornaquteqanngitsoq upperaarput. Amerlasuukkaanik tuniniaasarnerput unitsinneqarpat soorunami sulisut ikinnerit atorfissaqartilersussaavagut, Søren Lennert Mortensen oqarpoq.
Nunatsinni niuertarfiit angisuut allat aammalu namminersorlutik niuertarfiutillit Unammilleqatigiinnermut ataatsimiititaliap aalajangigaa nuannaarutigeqaat. Taakku isumaqarput aalajangiineq unammilleqatigiinnermut iluaqutaassasoq.
Qanoq iluaqutaatigissanersoq KNI-p pisortaanerata, Søren Lennert Mortensenip apeqquserpaa.
Taanna oqarpoq, namminersorlutik niuertarfiutillit namminneq Nuuk Imermit toqqaannartumik pisiniartalernissaat ajornakusoornerulissasoq aammalu puiaasat puuinik utertitsisarneq eqqarsaatigalugu taakkununnga aamma aaqqissuukkuminaassasoq.
Taakku toqqorsivinnik naammattunik sanaartorsinnaanersut aamma sikusartumiittut qanoq iliornissaat Søren Lennert Mortensenip apeqqutigaa.
- Nuuk Imermut isumaqatigiissusiornitsinni imeruersaatit tamaasa tuniniartassallutigit isumaqatigiissutigiissutigaarput. Umannilleqatigiittoqalerpallu pisiassat ikinnerusut tuniniarneqartalernissaat takorloorneqarsinnaavoq. Assersuutigalugu Coca Cola tunisaalluartorujussuuvoq, siunissamilu unammilleqatigiinnermi kisimiilluni iluanaarutaasinnaanera eqqarsaatigineqarsinnaalluarluni. Aamma eqqarsaatigineqassaaq unammilleqatigiinneq pilissappat Nuummi pisiassat akininnerulissapput, illoqarfinnili allani akitsornissaat qularinneqassanngilaq, KNI-p pisortaanera, Søren Lennert Mortensen oqarpoq.
Unammilleqatigiinnermut ataatsimiititaliap aalajangigaata eqqartuussivitsigut misilinneqarnissaanut apeqqut sapaatip akunnerata ataatsip ingerlanerani KNI-mit aalajangiiffigineqassasoq, Søren Lennert Mortensenip naatsorsuutigaa.
