KNI-mi Sulisoqarnermut pisortaq atorfimminit tunuarpoq
Sulisut suliffimminnut ilumoorsaanngitsumik kinguneqartinneqanngitsumik pissuseqarsinnaatillugit suliffeqarfimmi suleqataanini akuersaarsinnaajunnaaramiuk soraarniuteqarsimalluni Radioaviisimut ullumi oqaatigaa.
Käthe Franklinip sulisut 14-it suleqatitik qulit qinngasaarsimallugit pisortat qullersaannit Claus Jensenimit angerlartitaasimanerannut pisoq pivaa, ilumoorsaanngitsumik pissusilersorsimaneraagami.
Sulisut 14-it angerlartitaagamik, sulisunik aallussivimmi pisortap oqarneratut, sulisut allat avaqqullugit toqqaannaq siulersuisunut saaffiginnissimapput.
Saaffiginnimmatalu pisortat qullersaat, Claus Jensen, suilersuisut soraarsippaat, Peter Grønvold Samuelsenilu pisortaagallartussatut inissillugu. Sulisullu 14-it suliartoqqipput.
Pisut tamakku pillaasoqarani ingerlasinnaanerat pillugu Käthe Franklinip suliffeqarfimmiiginnarsinnaannginnini nalilersimavaa. Pisullu ingerlanerani sulisunit taakkunannga 14-init, siulersuisuniluunniit pisortanngortumit, Peter Grønvold Samuelsenimit, paasiniaavigineqarsimannginini sulisunik aallussivimmi pisortaanerminut qajannarsisitsisimasoq misigisimavoq.
Siulersuisuni ilaasortat pingasut, aningaasaqarnermut pisortaq, naatsorsuuserisut pisortaat niunernermillu pisortaq, Claus Jensenip soraarsitaareernerata kingorna KNI-mit soraarniuteqarsimapput, maannalu tassa aamma sulisunik aallussivimmi pisortaq Käthe Franklin soraarniuteqarluni.
KNI-mi siulersuisut siulittaasuat Niels Thomsen aningaasaateqarfiit, suliffeqarfimmut akiligassarsiisimasut sisamat KNI-mi aalassassimaartoqarneranik annilaangalersimasut Københavnimi aqagu ataatsimeeqatigissavai.
KNI-miit tusagassiutinut nalunaarummi oqaatigineqarpoq, KNI-p aningaaserivinnut attaveqarfigisaminut atatsimeeqateqarnissaa pilersaarutaareertoq ullumi marlunngornermi pisimasoq.
KNIp siulersuisuisa siulittaasuata Niels Thomsen-iop ataatsimiinermi naqissuserpaa, KNI aningaasarsiornikkut attartukkamigulluunniit ajornartorsiunngitsoq, maannakkullu aningaasanik tigoriaannarnik sillimmateqarnera, suliffeqarfissuup pisariaqartitaanut naapertuuttut.
Aamma tusagassiutinut nalunaarummi ersippoq, aningaseriviit taama nassuiaaffigineqarnertik tusaatissatut tigusimagaat, aningaasanillu attartortitsinertik attatiinnarlugu.
Jan Rahbech aamma Per Jensen KNI-mut aalaakkaasumik aaqqiisoqarnissaata tungaanut sullissiumanertik nalunaarutigaat, aamma KNI-miit nalunaarutigineqarpoq.
