KNI-mi siulersuisunik nutaanik inuttaliiniarneq ajornakusoortinneqarpoq
Naalakkersuisut siulersuisuni ilaasortaasinnaasunik nutaanik nassaarniarnertik ajornartorsiutigineraat, Demokratineersup Anda Uldumip paragraf 37 najoqqutaralugu apeqquteqaatigaa, maannamummi KNI suli ataatsimeersuartinneqanngimmat.
Tamatumani Aleqa Hammondip erseqqissaatigaa, naak piaartumik toqqaaniaraluarluni, Naalakkersuisut piginnaanilinnik pissarsisinnaasimanngitsut.
Taassumali ungasinngitsukkut aaqqiisoqarnissaa naatsorsuutigigini, ilanngullugu erseqqissaatigaa.
- Naalakkersuisut siulersuisuni ilaasortassanik piukkunnaatilinnik ujarlileruttorput, naatsorsuutigineqarporlu qanittukkut aalajangiiffigineqarumaartut, Aleqa Hammond akissummini allappoq.
Pisortaanerup Claus Jensenip soraarsitaanerata kingorna siulersuisuni ilaasortat pingasut tunuartut taarserneqartussaapput. Taamaammat Naalakkersuisut taakku taartissaannik piginnaanilinnik maanna ujarlileruttorput.
- Siulersuisuni ilaasortaasimasut tunuartut aningaasaliisarnernut, aningaasanik niuernermik, uuliap akiinik ilisimasaqarlutik, aqutsinermullu piginnaaneqarlutik, aamma inuussutissarsiutitigut misilittagaliupput. Siulersuisuni ilaasortanngortussat taama piginnaanillit ujartorneqartut Aleqa Hammond allappoq.