KNI corona ilungersuatitsigaluartoq nioqquteqarfikinnerugaluarlunilu aningaasaqarnikkut siuariartortoq
KNI 2019/20-mi akileraareernermi 76,1 millionit koruuninik sinneqartooruteqarpoq, 2,5 milliardit koruuninillu kaaviiaartitaqarluni.
Kinguariarfiulaarpoq, kaaviiaartitanili siuariartoqarluni, tamannali ikummatissanut immikkoortortami Polaroilimi pisinermi akit qaffasinnerunerannik ilaatigut pissuteqarpoq.
KNI-o naatsorsuutini 75,1 millionit koruuninik sinneqartooruteqarnissaa naatsorsuutigalugu juulimi nalunaarutigereerpaa. Naatsorsuutinili nutaani ingerlatsiviup aqutsisuisa ineriartortitsinissaq naatsorsuutigigaat allassimavoq.
Suliffeqarfissuaq KNI naatsumik oqaluttuaralugu
KNI-p oqaluttuassartaa Den Kongelig Grønlandske Handelip (KGH aaqq.) 1774-imi pilersinneqarneraneerpoq.
KGH namminersornerullutik oqartussanut 1986-imi tunniunneqarpoq, tassanilu KNI-mut imaluunniit Kalaallit Niuerfianut ikaarsaariartoqarluni.
KNI-p nioqquteqarfiit Pilersuisoq, Neqi, ikummatissaarniarfik Polaroil, amerlasuungorlugillu nioqquteqarfik KNI Engros ullumikkut pigai.
- Naatsorsuusiorfimmut 2020/21-mut aaqqissuussaanermi anguniakkat ukkatariinnarnissaat naatsoruutaavoq, tassa maannakkut ineriartorluarnerup ingerlaannarnissaa, aqutsisut nalunaarutaanni allassimasoq, 2014-imili pisortap, Peter Grønvold Samuelsenip oqaatigaa.
Ilanngunneqarporli:
- KNI-p tunngaviusumik ingerlatsinermi suliaqarnerani allannguuteqartoqangaatsiarnissaa naatsorsuutaanngitsoq.
Ukiup naatsorsuusiorfissap tullia 2019/20-mi naliliinerup assinganik 108-mit 118 millionit koruunimut inerneqartussatut nalilerneqarpoq. Naliliinermi kingullermi aileraannginnermi inernerit 113,3 millionit koruuniupput.
Corona ilungersunartorsiortitsingitsoorunartoq
Naak virus Covid-19 nunatsinni nunarsuullu sinnerani suli ilungersunartorsiortitsigaluartoq siuariartortitsinissamut angusaqarfiuvoq. Ukioq naatsorsuusiorfiup qaammataani siullerni nunarsuaq tamakkerlugu tunillaassuuttoqaraluartoq tamanna KNI-mut ajornartorsiortitsingaatsiarpasinngilaq.
- Ukiup naatsorsuusiorfiup qaammataani siullerni marlunni Covid-19-ip nunarsuaq tamakkerlugu tunillaassuunnera aningaasaqarnermut sunniuteqarneranik takussutissarsisoqanngilaq. Pissutsip malinnaaffigilluarneqarput sunniutaalu aannikinnerutinniarlugit pisariaqartunik suliniuteqartoqassalluni, aqutsisut allapput.
Tunillaassuuttoqarnerali ingerlatsinermut ukiup naatsorsuusiorfiup sinnerani appaaratarsinnaanera pinngitsoortinneqarsinnaanngilaq.
Illoqarfinnut annerusut noorartut unammillernartut
KNI-p pisortanit pigineqartup Namminersorlutik Oqartussanut kiffartuussinissamut isumaqatigiissut aqqutigalugu illoqarfiit minnerusut nunaqarfiillu nioqqutissanik pilersorlutillu pisiniarfiuteqarfigisassani nioqquteqartarfigai. Isumaqatigiissut sumiiffinni ingerlatsiniarnerup ajornarfiani pingaaruteqartunik nioqqutissaqartarnissaanut qulakkeerutaasussatut isumaqatigiissutaavoq.
Pisiniarfiuteqarniarnerup tungaaniit nunaqarfippassuarni illoqarfinnilu minnerusuni innuttaasut ukiut tamaasa ikiliartornerat KNI-mut ajoqutaaginnarpoq.
- Illoqarfinnut annerusunut noorartoqarnera KNI-p ineriartortitsinissaanut periarfissaanut annikinnerutitsinera unammillernangaatsiarpoq. Suliffeqarfiup aningaasartuutai aalajangersimasut allanngunngillat, pissutigalugu pisiniarfiit imminut akilersinnaanngitsut matuunnarnissaat periarfissaanngimmat, naatsorsuutini allassimavoq, tassanilu kiffartuussinissamut isumaqatigiissutit innersuutigineqarlutik.
Nunaqarfinni illoqarfinnilu minnerusuni innuttaasut ukiuni kingullerni tallimani 1.300-inik imaluunniit 5 procentiinik ikilipput.
Ukioq 2019-imit 2020-mut inuit 416-it illoqarfinnut annerusut nuupput, tamanna 1,9 procentimik ikileriarneruvoq.
