KNI aqutsisoqarnikkut tassanngaannaq ajornartorsiulerpoq
Suliffeqarfissuup pisortaanera Claus Jensen tunuaqquneqarpoq, aammalu aningaasaqarnermut pisortaq, naatsorsuuserinermut pisortaq aamma pisortaq tuniniaanermut amerlasuunngorlugillu tuniniar neqartartunut akisussaasoq nammineerlutik atorfimminnit tunuarput.
Aammattaaq siulersuisunut ilaasortat qallunaat pingasut tamatuma peqatigisaanik KNI-p siulersuisuinit tunuarput, Claus Jensenip tunuartitaanera tunngavissaqarluanngitsumik ingerlanneqarsorigamikku.
KNI-p siulersuisuini siulittaasuusimasup, Mikkili Skourupip, aggustimi tunuartinneqartup, pisut ingerlasimanerat tupaallaatiginngilaa. Taanna AG-mut ima oqarpoq:
- Claus Jensenip tunuartinneqarnissaa ilimagineqareerpoq, siulersuisut namminneq piukkussaminnik ivertitsiniassammata. Tamanna amerlangaatsiartorsuarnit tupaallaatigineqanngilaq, naatsumik oqarpoq.
Alaatsinaatsut qitiusumiittut allat – KNI-mi pissutsinik sukumiisumik ilisimaarinnittut – AG-mut oqaaseqarnissaminnut tunuarsimaannginnerupput.
- Siulersuisut nutaat qullersanut uparuaataasinnaasunik taamalu soraarsitsinermut pissutaasinnaasunik nassaarniarlutik qaammatinik marlussunnik atuisimapput. Tigussaasunik nassaassaqanngimmat pissutaasinnaasumik nassaartuusaartoqarpoq, tusarfik oqarpoq, taassumalu KNI »angallatitut aquttoqanngitsutut« isigilernerarpaa.
- Aquttarfik aqumiunik sueruppoq, aamma maskiinaqarfik soqanngilaq!
Politikkikkut soraarsitsinerunera, Niels Thomsenip ilumuunnginnerarpaa.
- Tamanna sakkortunerpaamik akerlilerusuppara. Aammami suliffeqarfimmik taamatut ingerlatsisoqartanngilaq. Politikerit ingerlatsinermut akuliuttussaanngillat, aamma akuliutinngillat, Niels Thomsen AG-mut oqarpoq.
KNI-imi atorfippassuit maanna nutaanik inuttassarsiuunneqartussanngornerat nassuerutigaa.
- Aap, unammiligassaavoq. Kisianni unammilligassat aaqqinneqarsinnaajumallutik atuuttarput, Niels Thomsen akivoq, aammalu millionerpassuarnik ajunngitsorsiassaqartitsisoqarnissaa ilumuunnginnerarlugu.