KNI angusarissaartoq

Akileraarutit ilanngaatiginagit sinneqartoorutit 101 millionit koruuniupput. Suliffeqarfissuup KNI-p oqaluttuarisaanermini angusat aatsaat taamak pitsaatigisut anguai, KNI tusagassiorfinnut nalunaaruteqarluni taama allappoq.

Ineriartorneq pitsaasoq 2013/2014-imi aallartinneqartoq allanngortinnagu suliffeqarfissuup taamaasilluni ingerlateqqippaa. Pingaartumik nioqquteqarnermik ingerlatsivik ukiup siulianut sanilliullugu angusaminik assut pitsanngortitsivoq:

- Ukioq naatsorsuiffiusoq 2015/16 aammaartumik nutaanik pissanganartunik unamminartunillu suliaqarfiuvoq,  periusissiornermi "KNI 2016-ip tungaanut"-mi immikkoortut amerlasuut KNI-p ullumikkut ingerlanneqarnerani atuutsinneqalersimallutik, KNI allappoq nangillunilu.

- Angusassamik siunnerfeqartumik aningaasartuutinik aqutsineq pisortat ingerlatiinnarpaat, taamaalilluni aningaasartuutit ukiup naatsorsuiffiusup siulianut sanilliullugit amerlanerusimanatik.

Nioqquteqarnermik ingerlatsivik tunngaviulluinnartoq

KNI-p nutaaliaanerusumik ingerlanneqarnissaani ilungersuutiginninnermi nioqquteqarluni ingerlatsivik tunngaviulluinnarsimavoq. Nioqquteqarluni ingerlatsivik maanna ajorisassaanngitsumik sinneqartoorpoq, tamatumunnga ilaatigut patsisaallutik nassiussugalerinerup, nioqqutit assigiinngitsut aqunneqarnerisa kiisalu suliffeqarfimmi qaffasinnerusumik piginnaaneqartoqarnissaata pitsaanerusumik ukkanneqarnerat.

Suliffeqarfiup nioqquteqarnermi ingerlatsiviani ingerlatat 34 millionit koruuninik sinneqartoorfiusumik naammassineqarput, ukiup naatsorsuiffiusup siuliani sinneqartoorutit 22 millionit koruuniusut.

Polaroilimi, ikummatissaqarnermut immikkoortortaqarfimmi, angusat 64,1 millionit koruuninik sinneqartooruteqarfiupput, ukiup naatsorsuiffiusup siuliani 61,5 millionit koruuniusimallutik.

Akileraarutit ilanngaatigereerlugit angusat 68 millionit koruuniunerisigut, namminerlu aningaasaatit 787 millionit koruuniunerisigut, KNI-p suliffeqarfissuartut aningaasatigut inissisimalluartuunera naqissuserneqarpoq.