KNI akiliisinnaajunnaartoqarneratigut annaasaqangaatsiarsinnaasoq
Nioqqutissat Pilersuisup sinerissami pisiniarfiiniittut, KNI-p suliffeqarfiutaanit Pitsaasuneersuupput, taakkulu danskit suliffeqarfiutaannit Senobisimit pissarsiarineqartarlutik.
Senobisip nioqqutissat nunatsinni piumaneqanngitsut pisiareqqissagai, suliffeqarfiit nioqqutissanik pisinermut atatillugu 2016-imi isumaqatigiissutigisimavaat.
Senobisillu suleqatigisaata suliffeqarfiup Euro-Outletsip nioqqutissat tunineqanngitsut pisiareqqissagai, Pitsaasut iluanni isumaqatigiissutigineqarluni.
AAMMA ATUARUK Akiliisinnaajunnaarnerit pisisartunik eqquinavianngillat
Pitsaasulli nioqqutissat utertitamik aningaasartaat tigusimanngisaannarai, KNI-p pigisani Pilersuisumi pisortaq, Niels Andersen oqarpoq.
- Pitsaasut nioqqutissanik Euro-Outletsimut tuniseqqippoq, Euro-Outletsili akiliinngilaq.
Nioqqutissat taakku 20 millionit koruuneqarput. Suliffeqarfiillu Senobisip Euro-Outletsilu sapaatip akunnerani matumani akiliisinnaajunnaarmata aningaasat taakku utertinnissaannut periarfissakinnerulerpoq.
- Ajornerpaaffiani 20 millionit koruunit annaasinnaavagut.
KNI-p Pitsaasut pigaa, taamaammat taakku 20 millionit koruunit KNI-p annaasinnaavai.
Annaasaqarneq KNI-p pisiniarfiini 300 millionit koruunit nalinganut iluarsartuussinissamut pilersaaruteqarnermut sunniuteqassasoq, KNI-mit oqaatigineqarpoq.
AAMMA ATUARUK Pilersuisup pisiniarfiinut nioqqutissanik pilersuisoq akiliisinnaajunnaartoq
Aningaasat utertinneqarsimannginnerat KNI-p nakkutiginnikkiartornerani paasineqartoq, KNI-p ilisimatitsissutigaa.
Pitsaasut siulersuisuini KNI-mit sinniisoqarpoq, nioqqutissalli Euro-Outletsimut tunineqarnissaat aalajangiunneqarmat KNI ilisimatinneqarsimanngilaq.
Suliffeqarfiup iluani maleruagassanik unioqqutitsinerujussuaqarpoq, KNI-llu sinniisua erngerluni taarserneqartoq, KNI ilisimatitsivoq.
Niels Andersen naapertorlugu akiliisinnaajunnaartut KNI-p atuisuinut, Pilersuisullu pisiniarfiini nioqqutissanut pisiassanut sunniuteqarnavianngillat.