KNI: Akiliisinnaajunnaarnerit pisisartunik eqquinavianngillat

Nioqqutissanik Pilersuisumut pilersuisartut marluk akiliisinnaajunnaarneri pisisartunut malunnaateqarnavianngilaq. KNI-li 20 millionit koruuninik annaasaqarsinnaavoq, tamannali annertugisassaanngilaq.
Allattoq Anton Gundersen Lihn
februaarip 01-at 2018 15:58

Suliffeqarfiit Senobis A/S aamma Euro Outlets Aps akiliisinnaajunnaarsimasut ullumi paasinarsivoq. Senobis piginneqatigiiffik Pitsaasut aqqutigalugu, Pilersuisumut nioqqutissanik pilersuisaraluarpoq. 

Akiliisinnaajunnaartoqarnera pisisartunik eqquinavianngitsoq Pilersuisumi KNI-mit pisineqartumi pisortap, Niels Andersenip, oqaatigaa.

- Pilersorneqarneq ajalusoornavianngilaq. Nioqqutissanik eqqortunik pilersuisoqarnissaa qulakkiissavarput, Andersen oqarpoq. 

AAMMA ATUARUK Akiliisinnaajunnaarnermi kalaaleq eqqugaaqataasoq

Sinerissami niuertarfiit ukiuunerani peqqumaasersornikuupput, taamaammat Pilersuisoq aatsaat aasaru nioqqutissanik nutaanik pisiniartussaavoq. Taamaammat pisariaqassappat pilersuisinnaasunik nutaanik nassaarnissatsinnut piffissaqarluarpoq. 

- Pisisartut allamik malussaateqarnavianngillat, taamaallaat nioqqutissa meqqiisa allanngorneri maligissavaat, Niels Andersen oqarpoq.

AAMMA ATUARUK Pilersuisup pisiniarfiinut nioqqutissanik pilersuisoq akiliisinnaajunnaartoq

Senobis A/S aamma Euro Outlets Aps akiliisinnaajunnaareernerini piginneqatigiiffik Pitsaasut Pilersuisut suleqatigiinnassaneraa nalunarallappoq. 

Piginneqatigiiffik Pitsaasut akiliisinnaajunnaartunit 20 millionit koruuninik akiitsoqarsifineqarpoq. Piginneqatigiiffilli KNI-mit qularnaveeqquserneqarnikuummat KNI 20 millionit koruuninik annaasaqaratarsinnaavoq. 

Aamma atuaruk