KNAPK siunnersuummut tupaallattoq
KNR-mi oqaluttuaraarput Naalakkersuisut ukiunut tallimanut atuuttussanik sinerissap qanittuani pisassiisalerusuttut.
Tamannalu aalisarnermik inatsimmik allanngortitsiniarnerisa ilagigaat aalisarnermut inatsit Inatsisartunut upernaamut qaqinneqalerpat.
Nutaarsiassaq KNAPK-mit tupaallaatigineqarpoq taakkunanngalu kaammattuutigineqarpoq aalisarnermut inatsit sukumiisumik suliarineqartariaqartoq ullumikkut qaleralittasseeriaatsit assigiinngitsut marluk atorneqarmata. Paggatassiinerit kiisalu angallataatilinnut pisassat aningaasanngorlugit tunineqarsinnaasut.
- Soorunami siullermik tupaallannalaarpoq. Tusagassiuutitigut tusarparput taamatut pilersaaruteqartoqartoq. Kisiannili uani eqqaamassavarput qaleralinniarneq eqqarsaatigissagutsigu ilaatigut aalisariutit 6 meteri sinnerlugu angissusillit kvoteandelimik pissarsisarput. Tassalu kvoteandelimik pissarsisartut taakkua ilisimaarikannerpaat qanoq annertutigisumik ukiuni tulliuttuni pisassaqarnissartik, Henrik Sandgreen KNAPK-mi siulittaasoq oqarpoq nangillunilu:
- Kisianniliuna paggatassiissutini ukunani olympisk fiskerimik taaneqartartuni pisassat ammarnerini annertuumik taamatut aalisapalassinnaaneq tunngavigalugu aalisariaaseqarneq tassani annertuumik ajornartorsiutitaqartoq. Taassuma iluarsiniarneqarnerani qanoq ilusilimmik aaqqissuussiniartoqarnera tassa taanna pissanganarpoq takussallugu, Henrik Sandgreen oqarpoq.
Taamaattumik Henrik Sandgreenip sukumiisumik mianersortumillu siunnersuutip suliarineqarnissaa inassutigaa, pisasseeriaatsip aappaa aalisarnermik aallutaqartunut aningaasanik naleqarmat:
- Una sukumiisorujussuarmik eqqartugassaassaaq. Matumanimi pineqaramik pisasseeriaatsit assigiinngitsut marluk. Tassalu olympisk fiskeri aammalu pisassanik aalajangersimasunik, tassalu kvotanik, tunniussisarneq. Taakkualu aningaasanik naleqarput. Aningaasanillu nalilinnik tunniussisimagaanni utertinniarneri allaanerusumillu aaqqissuussiniarneq taanna imaanngitsupilussuuvoq. Taamaammat pissangartupilussuuvoq qanoq ilusilimmik matumani pilersaaruteqartoqarnersoq, Henrik Sandgreen oqarpoq.
Pinngortaleriffik ukiut marlukkaarlugit aalisagartassanut siunnersuuteqartarami ukiunut tallimakkaartunik pisassiisalerniarneq ajornaqutissaqarsorinngilaat:
- Pisassiissutissanut siunnersuutigisartakkagut ukiunut marlunnut atuuttarput. Tamanna isumaqarpoq ukiut marlukkaarlugit aalisagaqassusermik misissuisartugut tamatumalu kingorna pisassiissutigineqartussanut ukiunut tulliuttunut marlunnut siunnersuuteqartartugut. Ukiunut tallimanut pisassiisoqartalissappat, uani naatsorsuutigaara pisassat aqunneqarnerinut pilersaarummik ilanngullugu sanasoqassasoq, taava aamma pisassat allanngortinneqariataarsinnaaneri sillimaffigineqartariaqarpoq biologit siunnersuinerat allanngorujussuassappat, Helle Siegstad Pinngortitaleriffimmeersoq taama oqarpoq.
