KNAPK: Russinut isumaqatigiissut ajorpoq

Aalisarneq pillugu isumaqatigiissut nutaaq, russit Kalaallit Nunaata imartaani, aamma Kalaallit Nunaata Barentip imartaani, aalisartarnerannut tunngavoq.

Aalisarnermut Naalakkersuisoqarfiup, Nunatsinnilu atorfillit, Moskvameeqataasut, isumaqatigiissut "Kalaallit Nunaannut pingaaruteqarluinnartutut" taagaluaraat, KNAPK allatorluinnaq misigisimavoq.

Isumaqatigiissutip inerneri KNAPK-p "pakatsinarluinnartuunerarpai",
isornartorsiuinerminullu tunngavilersuutigaa kisitsisit inernerisa takutimmassuk, isumaqatigiissut russit Kalaallit Nunaannit pissarsissutiginerungaassagaat takusinnaagamikku.

Kalaallit Barentip imartaani saarullittassaat kullerertassaallu 36 millionit koruunit missaat sinnilaarlugit isertitsissutaassasut KNAPK-p naatsorsorpaa, russilli suluppaakkanit qaleralinnillu 52 millionit koruunit Ruslandimut isertitsissutigissagaat naatsorsorlugu.

Assigiinngissut tassa 15 millionit 790.000 koruuniussaaq, Ruslandimut iluaqutaasussaq, isumaqatigiissullu Naalakkersuisut akuersissutigisariaqanngikkaat KNAPK isumaqarpoq.