KNAPK: Pisuussutigut uumassusillit annaattariaqarpavut
Tamannalu qanoq iliuuseqarfigineqanngippat, Inuttut inuussutigut siunissami tammariaannaapput, Tamannalu pinngitsoortinniarlugu ICC-p aataatsimeersuarnerani aalajangerneqarpoq, ICC immikkut ataatsimeersuartitsisariaqartoq.
- Tamannalu Kalaallit Nunaannit peqataaffigalugu tapersersortariaqarparput, tassami silap allanngoriartornerata kinguneranik uumasut imarmiut, aalisakkat nunamilu piniagassat siunissami annertuumik eqqorneqartussaapput aamma issittumi uuliasiornerit aatsitassarsiornerillu eqarsaatigalugit avatangiisitta mianerineqarnissaat sorsuutigiuartariaqarlutigu.
KNAPK sinnerlugu ICC-p Inuuvimmi aqqaneq aappassaanik aataatsimeersuarneranut peqataasoq, Leif Fontaine taama oqarpoq.
- ICC-p tulliani ataatsimeersuarnissaa nallertinnagu anguniarneqartut malillugit sulinissarput Kalaallit Nunaanniit peqataaffigisariaqarparput. Tassami pinngortitamik atuisugut pinngortitallu piujuaannartinneqarnissaanik sulissuteqartuusugut ataatsimeeqatigiissinneqarnissarput pingaaruteqarmat, Leif Fontaine oqarpoq.
ICC-mi siulersuisunngortut nutaat suliassaasa ilagaat, Inuit Nunaanni avatangiisinik illersuinerup maannamullu suliaasup salliutillugu inaarsarneqarnissaa. Matumani pineqarluni Pinngortitamik Allanngutsaaliuiniarluni Nunat Tamalaat Suleqatigiiffiannut aamma Uumasunik Naasunillu Nungutaanissamut navianartorsiortunik, nunat tamalaat akornanni niuertarneq pillugu, ICC-p suliaanik nangitsilluni naammassinninnissaq.
Uuliasiornerit aatsitassarsiornerillu ukiuni kingullerni amerligaluttuinnarlutik avataaniit aningaasarsiutigineqarneri eqqarsaatigalugit, Issittumi inuiaqatigiit tamarmiulluta pisinnaatitaaffigut atorlugit nunanut allanut erseqqissaatigisariaqarparput, ulluinnarni atukkagut uangutsinnut qanoq pingaaruteqartigineri, Leif Fontaine oqarpoq imalu nangilluni.
- Tamannalu aatsaat angusinnaavarput nunat tamalaat akornanni sulinikkut, tassuunakkut Issittumi pissusiviusut nunarsuarmioqatitsinnut qaammarsaatigalugit, minnerunngitsumillu pinngotitami uumassusilinnik atuinitsinni pisinnaatitaaffitta attatiinnarneqarnissaanik, soorlu tamanna nunat tamalaat akornanni isumaqatigiissutaareersoq, paasitsiniaanikkut. Taamaaliorutta Issittumi inuuginnarnissarput aatsaat angusinnaavarput.
KNAPK sinnerlugu ICC-p aqqaneq aappassaanik Inuuvimmi ataatsimeersuarnerani peqataasoq, Leif Fontaine taama oqarpoq.
"Kitigaaryuinnit nalunaarummi" aamma sulissutigeqquneqarpoq, Inuit inuussutissaqarniarneri eqqarsaatigalugit aamma Inuit qangaaniit ileqqutoqqatik malillugit, anersaakkut inuuneri uumasunillu ingerlaartartunik inuussuteqarnerisa illersorneqarnissaat.
2018-mi ICC-p Alaskami illoqarfimmi Barrowimi tulliani ataatsimeersuartitsinissaa nallertinnagu anguniaqqusatut peqqussutit immikkoortut 46-t, ICC-p siulersuisuunerisa nutaat sulissutigisassaattut kajumissaarutaapput.
