KNAPK-mi pisortap sulinnaarallartitaanera suli nassuiaatissaqanngitsoq

Kalaallit Nunaanni Aalisartut Piniartullu Kattuffianni, KNAPK-mi, pisortaq sapaatit akunnerata siuliani suliunnaarallartitaavoq. Suliunnaarneq pillugu isumaqatigiissusiortoqarpoq. Tassa imaappoq, Tønnes Berthelsen KNAPK-mi pisortaajunnaarpoq.

Sermitsiaq.ag. taama allappoq.

Tønnes Berthelsenip suliunnaarnera pillugu isumaqatigiissusiornermut uppernarsaat atsiorsimagitsik, pisortaq Tønnes Berthelsen siulittaasorlu Henrik Sandgreen sisamanngormat nalunaarput.

KNR-ip nalunaarutaat pissarsiniarsimagaluarpaa – iluatsinngitsumilli.

Tassami KNAPK-p siulittaasua, Henrik Sandgreen, ullumikkut ulloq naallugu ataatsimeeqateqartussaavoq – taannalu nalunaarutiminnik nassiussisinnaasutuaasoq, kattuffimmi siunnersorti ilisimatitsivoq.

KNR-ip Tønnes Berthelsen aamma apersorniarsimagaluarpaa – iluatsinngitsumilli aamma. 

AAMMA ATUARUK KNAPK-mi immikkut siunnersorti soraarsitaasoq

Tønnes Berthelsen sapaatit akunnerata siuliani pingasunngornermili suliunnaarallartitaavoq.

KNAPK-mi arlaannaalluunniit tamanna pillugu oqaaserusunngitsoq, sermitsiaq.ag allappoq.

Sapaatit akunnerata siuliani pingasunngornermi suliunnaarallartitaasimalluni, Tønnes Berthelsen Facebookimini sapaatiummat allappoq.

AAMMA ATUARUK Tusagassiuut: KNAPK-mi pisortaq atorfimminit tunuartitaagallartoq

- KNAPK-p siulittaasuanit allakkanik “Suliunnaarsitsigallarneq”-mik qulequtalinnik pingasunngormat allagarsivunga. Ulluinnarni aqutsisut misissuisitsissapput.

- Patsisaa naluara eqqoriaaqattaarpunga. Aningaasanut tunngasinnaanngilaq taanna toqqaannaq isumagisarinnginnakku, allamut tunngasimassaaq. Ikaartarfinnik ikuallaarusunnginnama taamatut naatsigisumik nalunaalaarpunga. Ernumagissanngilarsi toqqaserluutissaqanngilangami, Tønnes Berthelsen allappoq.

KNAPK-mi immikkut siunnersortitut atorfilik aamma soraarsitaavoq.