KNAPK-mi immikkut siunnersorti soraarsitaasoq

Erseqqissaat pingasunngorneq, 17:10:

KNAPK-mi immikkut siunnersortitut atorfilik, kattuffimmi atorfimminnit suliunnaarallartitaasoq allaaserisami siullermik allassimagaluarpoq. KNAPK maanna ilisimatitsivoq, siunnersorti soraarsitaasoq.

KNAPK-ip allattoqarfiani sulisuni sisamaasuni ataaseq suliunnaarallartitaavoq.

KNAPK-mi immikkut siunnersortitut atorfilik, kattuffimmi atorfimminnit soraarsitaavoq. Aamma Kattuffimmi pisortaq, Tønnes Berthelsen, suliunnaarallartitaasoq Sermitsiaq.ag-p sapaatit akunnerata naanerani allaaseraa.

Paasissutissat taakkua KNR-ip tusarfiinit uppernarsarneqarput.

Sooq taama pisoqarnersoq nalunarpoq.

AAMMA ATUARUK Tusagassiuut: KNAPK-mi pisortaq atorfimminit tunuartitaagallartoq

KNR-ip paasisai naapertorlugit kattuffiup allattoqarfiani sulisut maanna pisut pillugit ulluinnarni aqutsisut ataatsimeereertinnagit oqaaseqarniaratik atsioqatigiissimapput.

Kattuffimmi ulluinnarni aqutsisut ullumi ataatsimiittussaagaluarput, aqutsisunulli ilaasortat ilaat Nuummut ullumi tikissinnaanngimmata ataatsimiinnissaq aqagumut kinguartinneqarpoq.

Ernumaqqusinngilaq

KNR-imiit suliunnaarallartitaasoq soraarsitaasorlu sianerfigisaraluarpagut akinerli ajorput.

Pisortaq, Tønnes Berthelsen, suliunnaarallarsitaanini pillugu Facebookkimini sapaatiummat ima allappoq:

- Pingasunngormat KNAPK siulitaasuata allakamik tunivaanga qulequtaa imaattumik; “Suliunnaarsitsigallarneq”.

- Patsisaa naluara eqqoriaaqattaarpunga. Aningaasanut tunngasinnaanngilaq taanna toqqaannaq isumagisarinnginnakku, allamut tunngasimassaaq. Ikaartarfinnik ikuallaarusunnginnama taamatut naatsigisumik nalunaalaarpunga. Ernumagissanngilarsi toqqaserluutissaqanngilangami, Tønnes Berthelsen allappoq.