KNAPK atorfilittallu Portugalimeereerlutik assortuuteqattartut
KNAPK aalisarnermullu naalakkersuisoqarfik eqqissiviillioqaat.
Sussaanngilaq.
KNAPK-p aalisarnermullu naalakkersuisoqarfiup akunnerminni pissusaat naatsumik taama nalilerneqarsinnaavoq.
Aalisarnermut Naalakkersuisoqarfik aalisartullu kattuffiata akunnerminni suleqatigiinniarnerat iluatsinngilaq. NAFO-mut, tassa atlantikup avannaata kitaani aalisarnermut kattuffimmut, alaatsinaattutut peqataanissaami naalakkersuisoqarfimmit akornusersorniarsarineqartutut KNAPK nalilerpaa.
NAFO ukiumoortumik Portugalimi septembarip 19-nit 23-nut ataatsimiippoq. NAFO tassaavoq atlantikup avannaata kitaani aalisarnermut kattuffik.
KNAPK ataatsimiinnermi peqataavoq. Siulittaasullu Nikkulaat Jeremiassenip nalunaarnera naapertorlugu tamanna "assigiinngitsunik misigisaqarfiuvoq." Namminersorlutimmi Oqartussat KNAPK-p aalisarnermut kattuffissuarmi alaatsinaatsutut inissisimalernissaa akornusersorniarsarigaa, Nikkulaat Jeremiassen tusagassiuutinut nalunaarummi allappoq.
Naalakkersuisoqarfik ulloq ataaseq qaangiummat akivoq.
Pisoq naatsumik
NAFO, atlantikup avannaata kitaani aalisarnermut kattuffik, ukiumoortumik Portugalimi septembarip 19-annit 23-nut ataatsimiippoq.
KNAPK alaatsinaatsutut peqataanissaminut kattuffimmut qinnuteqarpoq
Aalisarnermut naalakkersuisoqarfimmi atorfilittat naapertorlugit peqataassagaanni ullut 100-it sioqqullugit qinnuteqartoqariissaaq. KNAPK NAFO-mit peqataanissamut aggutsip 19-anni allagarsivoq. Ukiulli suut peqataassanersut allaqqanngilaq.
KNAPK-p Danmark aallartitaqarnerarlugu isornartorsiuivoq. Taamaattoqanngitsorli naalakkersuisoqarfimmiit oqarput.
KNAPK NAFO-p ataatsimiinnerani peqataarusuppoq – KNAPK naapertorlugu pisassanik aalajangersaasoqarpoq.
Aalisarnermut naalakkersuisoqarfiup tamanna ilumuunnginnerarpaa. ukiumoortumik ataatsimiinnermi nunat namminneq inatsisitigut akisussaaffigisaasa iluini aalisarnerit aalajangersarlugit sammineqarneq ajortut, naalakkersuisoqarfik allappoq.
- Aalisarnermut Piniarnermullu Naalakkersuisoqarfiup sakkortunerpaamik KNAPK-p NAFO-imi alaatsinaattutut peqataasalerumalluni kissaateqarsimaneranut illua-tungiliisimaneraaneranut pasilliutai eqqortuunngimmata oqaatigineqassaaq, naalakkersuisoqarfik akipiloorpoq.
- Taamaattoq aalisarnermut piniarnermullu naalakkersuisoqarfiup sapinngsani tamaat pitsaasumik KNAPK-p, NAFO-mi alaatsinaattutut peqataasalerusulluni kissaateqarneranut atatillugu maleruagassat suleriaatsillu pillugit ilitsersorluarsimavaa. Aamma NAFO-mi ukiumoortumik ataatsimiittarnerni suliat suut pillugit suliaqartoqartarneranut ilanngullugu.
NAFO-p ukiumoortumik ataatsimiinnerani alaatsinaattutut peqataassagaanni ataatsimiinneq ullunik 100-nik sioqqullugu qinnuteqareersimasariaqarpoq. KNAPK-li taamaaliorsimanngitsoq naalakkersuisoqarfik allappoq.
- Taamaammallu NAFO-p ukiumoortumik ataatsimiinnissaani alaatsinaattutut aatsaat 2023-mi peqataasinnaammata. Naalakkersuisoqarfiup KNAPK ukioq manna ukiumoortumik ataatsimiinnissamut nunatta aallartitaannut peqataasussatut aggersarsimanngikkaluarpagit, peqataasinnaasimassanngikkaluarput, naalakkersuisoqarfik allappoq.
Naalakkersuisoqarfimmi pisortap aaqqiangiinngissutit iluminni aaqqeqqaarusukkai
KNAPK-lli siulittaasuata KNR-mut oqarnera naapertorlugu KNAPK NAFO-p ataatsimiinnerani alaatsinaatsutut ukioq manna peqataanissaminut akuerineqarpoq.
- NAFO-p qullersaqarfianit allagarsereernikuuvugut 2022-mi peqataasinnaasugut piumasaqaatit taakku naammassisimagatsigit, Nikkulaat Jeremiassen KNR-mut oqarpoq.
Taassuma ukioq manna peqataanissamut, NAFO-mit akuersissut, KNR-mut nassiunniarlugu apersorneqarami neriorsuutigigaluarpaa. KNR uppernarsaatinik noqqaalluni marloriarluni KNAPK-mut attaveqaraluarpoq, takussutissamilli pissarsinngilaq.
KNR-p aalisarnermut naalakkersuisoqarfimmi pisortaq, Jørgen Isak Olsen pisoq pillugu apersorusullugu saaffigigarluarpaa. Taannali KNAPK-lu aaqqiangiinngissutitik iluminni aaqqitsinnagit tusagassiorfinnut nalunaarutip saniatigut oqaaseqarniaratik oqarpoq.
Danmarkip aallartitaa?
Taannaannarli ajornartorsiutaanngilaq. KNAPK-mmi sinniisutut aallartitat isornartorsiorpai.
Danmark aallartitaqarsimanerarlugu isornartorsiuilluni.
- Danmarkip aallartitaa aamma tassani takuarput. Kisianni naapinngilagut. Takuinnarpagut, Nikkulaat Jeremiassen KNR-mut oqarpoq, Nikkulaat Jeremiassen oqarpoq.
Naalakkersuisoqarfilli naapertorlugu Danmark aallartitani peqataatitaqarneq ajorpoq. Nunarpulli Savalimmiullu peqataasarlutik.
KNAPK-p Danmarkip aallartitaqarnera uppernarsaatissaqartikkaa siulittaasuat KNR-imit apersorneqarami aamma oqarpoq. Uppernarsaat nassiunniarlugu neriorsuutigigaluarpaa KNR-illi aamma taanna noqqaassutigigaluarlugu pissarsiarinngilaa.
Isumaqatigiinngissutaalli taakkuinnaanngillat.
KNAPK-p NAFO ukiumoortumik ataatsimiimmat pisassat aalisagaqatigiillu suut qallorneqassanersut aalajangersarneqarsimanerarpai.
- Peqassutsit allallu eqqartorneranerini suut qanoq qallorneqassasut qanorlu annertutigisut qallorneqassasut eqqarsaatigalugit annertussusilersuipput, Nikkulaat Jeremiassen oqarpoq.
NAFO-li nunatsinni pisassanik aalajangersaaneq ajorpoq. Pisassiissutissanilli siunnersuisarluni. Naalakkersuisut pisassanik oqimaassusaannik aalajangiisarput.
NAFO ukiumoortumik ataatsimiinnermini nunat namminneq inatsisitigut akisussaaffigisaasa iluini aalisarnerit aalajangersarlugit sammineq ajoraat, naalakkersuisoqarfik allappoq.
- Nunarput NAFO-mi ilisimatusaatitagalugu ataatsimiititaliaanut akiliuteqartarpoq. taakkua qaleralinnut aamma raajanut nunatta kitaata sineriaani siunnersuusiortarneri peqqutigalugit. Aalisarnerilli taakkua NAFO-p ukiumoortumik ataatsimiinneranni eqqartorneqartaratik, naalakkersuisoqarfik akivoq.
- Taamaammat KNAPK-p NAFO-imi alaatsinaattutut peqataasalerniarnerminnut suliartik paatsoorsimassavaat, naalakkersuisoqarfik allappoq.
Aalisarnermut naalakkersuisoqarfiup alaatsinaatsutut peqataanissassinnik paatsoorsimanerarpaasi. Ukiumoortumimmi ataatsimiinnermi nunat namminneq inatsisitigut akisussaaffigisaasa iluini aalisarnerit sammineqarneq ajorput. Ilumoorpa paatsoortusi?
- Paattooqqanngilluinnarpugut aamma nalorninngilluinnarpugut. Malinnaaqqinnaarpugut pisunut soorunami nutaajuvugut. Kisianni suut tamaasa pisartut aallavigalugit malinnaagatta suliassarput suliagullu paattooqqanngeqaagut. Nikkulaat Jeremiassen KNR-mut oqarpoq.
- Oqartoqassappat suliassarput paattoorsimagipput, uatsinniinngilaq.
Taava kikkut paatsoorsimappat?
- Naalakkersuisoqarfik paattoorpoq, KNAPK-p siulittaasua, Nikkulaat Jeremiassen oqarpoq.