KNAPK arferit pillugit: Tupaallannartoqanngilaq
- Tupaallannartoqanngilaq.
KNAPK-p siulittaasua, Nikkulaat Jeremiassen, arferit silap pissusiata allanngoriartorneratigut ukioq 2100-p missaani kitaaniit avannarpasinnerusumiilernissaannik Pinngortitaleriffiup Issittumilu ilisimatusartut allat nalunaarusiaanni qanittukkut saqqummiunneqartumi ilimasaarutigineqartoq pillugu taama oqarpoq.
Misissuinerit tikkuussisut
Silap pissusiata allanngoriartornera ilutigalugu imaq kissakkaluttuinnassappat Issittumi arferit ukioq 2100-p missaani avannarpartilissapput.
Arferit avannaanut ingerlaassasut
Ilisimatusartut arferit 227-t malinnaaffigalugit arferit ingerlaartarnerat silap pissusiata allanngoriartorneranit allanngortinneqassasoq paasivaat.
Silap pissusiata allanngoriartornera pissutigalugu Issittup ilarujussuani 2100-ip tungaanut immap sikoqarunnaassaaq.
Tamanna pingaartumik Tunumi Barentshavetimilu pissaaq, nunattalu kitaani immap sikua annikitsuinnaq katassalluni.
Immap sikua nunatta kujasissortaani kissangaatsiarpat arferit kujataaniikkunnaarlutik avannaanut ingerlaalissapput.
Arferit 2100-imi 250 kilometerinik avannamut nuukkiartorsimassapput. Ukiukkut 125 kilometerinik avannarpartersimasassasut nalunaarusiami allassimavoq.
Pinngortitaleriffimmi ilisimatusartut Issittimilu ilisimatusartut allat arferit nalunaaqutsersukkat ingerlaartaasiinik ukiuni 30-ni kingullerni malinnaaviginnereerlutik nalunaarusiaat qanittukkut saqqummersoq taama tikkuussivoq.
Tassunga nunatsinni aalisartut piniartullu kattuffianni siulittaasoq Nikkulaat Jeremiassen ima oqaaseqarpoq:
- Tassa taanna tupaallaatiginngilara massakkut taamaareermat. Uku qilalukkat allallu sikup uumasui itsarsuarli taamaassimassapput, taamaammat taanna tamatut siulittuut paasineqarsimappat, uatsinnut nunap inuinut ukiumut ulluni 365-ini nunamik najuisuusunut isumaqarpunga tupaallaataanngitsoq.
Qilalukkat qaqortat Tunup sineriaaniittarput
Nikkulaat Jeremiassenip qilalukkat qaqortat najugannaaminni uninngaannartannginnerat assersuuteqarfigaa:
- Upernassaq manna pisoq assersuutigilaarlara, Tunumi pisoq; Tasiilap eqqaani qaqortanik qilalugaqanngimmat pisassiiumasoqanngitsoq, tassanili piniartut oqaluttut qilalugarpassuaqartoq.
- Tassa ingerlaartuungamik uumasut piniakkat. Pisaqarmata arsaarinnissutigineqarpoq, qilalugaqanngimmat pisassiisoqarnikuunngimmallu.
Qaleraleqarfinniittartut amerlerujussuarsinnaapput
Immap kissakkiartuinnarneratigut arferit 2100-mi avannarpasinnerusumiilissapata, tamanna Nikkulaat Jeremiassenip ima kinguneqarsinnaanerarpaa:
-Ulorianartorsiortitsinera uaniittussaassoq; qilalukkat qaleralittortut sumiiffiit ilaanni amerleriarujussuassappata, soorunami taanna ernumanartoqarsinnaavoq.
-Kisianni arferit anginerusut nunatsinni inuussutissatut annertunerusumik ilisimaneerukkiartuaarnerat taamaanginnassappat, tikaagulliusaakkut, qipoqqakkut allallu eqqarsaatigalugit annertunerusumik sunniuteqartussatut uanga takorluunngilara. KNAPK-ip siulittaasua Nikkulaat Jeremiassen taama oqarpoq.
