Knallertertumik aallaannittoq ukiuni sisamani parnaarussaassaaq
17-inik ukiulik Inunnguaq Nielsen, niaqqumigut siorna novembarip pingajuanni aallaaneqarnermi kingorna inuunini tamaat attatassaminik innarlerneqarpoq.
Nick Madsen toqutseriarsimasutut unnerluussisussaatitaanermit pasineqarluni eqqartuunneqaraluarpoq, toqutseriarsimanngitsutullu nalilerneqarluni.
Suliarli ilungersunartutut eqqartuussivimmit isigineqarpoq, pillaasarnermilu inatsimmi paragrafi sukannernerpaaq atorneqarluni. Paragrafi pineqartoq toqumik kinguneqartumik persuttaasoqarneranut tunngassuteqarpoq.
51-nik ukiulik unnerluutigineqarpoq Inunnguaq Nielsen knallerterluni nipiliormat uumitsaallugu aallaasimammagu. Eqqortuunnginnerarpaali Inunnguaq Nielsen toqqarlugu umersimagini, nassuerlunili aneerasaartarfimminiit knallerti aallaammik eqqoriarsimallugu.
- Igeriarlunga iseqqipallappunga. Uppinnersoq takunngilluinnarpara. Knallertili eqqoriaraluarpara Nick Madsen eqqartuussivimmi nassuiaavoq.
Nassuiaataali siusinnerusukkut politiinut nassuiaatigisimasaanit allaanerupput, inmiussami eqqartuussivimmi tusaatinneqartumi oqarsimagami " aallaarusussimallugu".
Unnerluutigineqartoq toqutsisimasutut siusinnerusukkut eqqartuussaasimasoq pinngitsuunerarpoq, nassuiaasimallunilu iliuuseqarnermi nalaani nakorsaatitukkaminik puuallatsinneqarsimalluni. Isiginnittuusimasut nassuiaatinneqarnerisigut suliaq ingerlaqqissaaq.