Kitaata avataani uuliamik ujaasilluni qillerinissat Canadap paasisaqarfigerusuppai
Canadami avatangiisinut ministerip Jim Prenticep, uuliamik ujaasilluni Davisstrædemi ukiormanna qillerinissat pillugit annerusumik paasissutissinneqarnissaminik Nunarput qinnuiginiarpaa. Mexicop Kangerliumanersuani uuliasiornikkut ajutoortoqarnerata kinguneranik, uuliasiorluni qillerinikkut ajutoorfiusinnaasut Canadamit maluginiarneqartorujussuanngorput. Canadami avatangiisinut ministeri Jim Prentice, aviisimi Calgary Heraldimi sapaatip akunnerani matumani apersorneqartilluni oqarpoq, Canada 2014 sioqqullugu issittumi uuliasiorluni qillerinissamik pilersaaruteqanngitsoq, tassami taamanikkussamut BP-p uuliamik mingutsitsinerata ilinniutiginissaanut piffissaqarluartoqareersimassammat. Avatangiisinut ministerip ilanngullugu oqaatigaa, Kalaallit Nunaata Davis Strædemi uuliamik ujaasilluni qillerinissanut akuersissutit tunniussai ernumanartinneqartut.
Canadap avatangiisinut ministeria aamma oqarpoq, nunat issittumiittut avatangiisinut ministerii juunip qulingiluaanni ataatsimiilerpata kalaallit peqataatitaat, ernummatigineqartut pillugit oqaloqatiginiarlugit annerusumillu paasissutissinneqarnissani piumasariniarlugu.
- Mexicop Kangerliumanersuani pisut quarsaarutigeqaavut, issittumilu taama pisoqarnissaa tamatta kissaatiginngilluinnarparput. Allatut ajornartumik issittumi iliuuseqarnitsinni tamani, avatangiisinut tunngatillugu isumannaatsuunissamut piumasaqaatit annerpaat malittariaqarpavut, qanorlu pisoqariataarsinnaanissanut piareersimalluta, Canadami avatangiisinut ministeri Jim Prentice naggasiivoq.
