Kitaani tuttorpassuupput
Kitaani tuttoqarluarpoq, ukiunilu kingullerni marlussunni taamaassimavoq. Pinngortitaleriffimmeersoq Josephine Nymand oqarpoq. Tuttoqarluarmalluuna ukioq manna tuttunniarneq sivitsorneqartoq.
Tuttut sapinngisamik amerlanaarlugit pisarineqarpata tuttoqassusaanut iluaqutaassaaq, Josephine Nymand oqarpoq.
Tuttut amerliartorluarnerat tamatumunnga peqqutaavoq. Tassa piaqqiarineqartut pisarineqartartunit amerlanerupput. Tuttulli qanoq ippat?
Upernalernerani pitsaanerpaanngillat, Kangerlussuup eqqaani misissuinerup takutippaa tuttut ilarpassui saluttuusut tamannalu ukiuunerata sivisullunilu issilluarsimaneranik peqquteqarpoq. Aasarmannali kiallunilu naasoqarluarmat suli ukiortinnagu puallarluarnissaat ilimanarsinnaasoq, Josephine Nymand oqarpoq.
Nuummiummita sumut aavariarunik tuttunik pualasuunik naammattoorsisinnaassappat? Tamanna Josephine Nymandip nalunarnerarpaa, ilaqutariimmi aavariartartut aavariarfinnaaminnukartarsorai tuttullu nuuttartuummata nalunarallarnerarpaa.
Tuttut ukiup ingerlanerani ingerlaartarfii paasiniarniarlugit kulavaat 40-t Pinngortitaleriffimmiit siorna satellittimut nassitsisinnaasunik nalunaaqutserneqarput. Nalunaaqutsikkalli ilaat pisarineqasimapput 30-illu sinnerussimallutik. Josephine Nymandillu nalunaaqutsersukkat mianersuunneqarnissaat kaammattuutigaa.
Tuttut erseqqissunik sakkortuumik qalipaatilinnik antennetalinnillu qungasequtserneqarsimapput. Taamaattumik takugaanni uagutsinnut sianerluni sumi takusimanerlugu oqaluttuarineqarpat qujarutissaqaarput. Tuttut qungasequsikkat pisarineqassanngillat aammami nalunaaqutsersukkat pisarineqarnissaat inerteqqutaammat.
Josephine Nymandip tuttut nalunaaqutsersukkat suli ukioq ataaseq malinnaaffigisussaavai. Tuttunniarnermik umimmanniarnermillu nakkutilliineq Namminersorluni Oqartussat sukannernerulersissimavaat. Tassa piniarnermik nakkutilliisut nunami tamarmi tuttunniartut piniarnermik allagartaqarnersut akuersissummillu peqarnersut nakkutigineruniarpaat.
Aavarluarisi.
