Kitaani immap assingi nutarterneqassapput
Taamaattumik angallannermut attaveqaqatigiinnermullu naalakkersuisoq Jens B. Frederiksen aamma Danmarkimi avatangiisinut ministeri Troels Lund Poulsen suleqatigiinnissamik isumaqatigiissummik atsioqatigeeqqammerput, tamatuma kinguneranik, Nunatta imartaani angallaffiunerpaani, immap assinginik qarasaasianik assigisaannillu suliat amerlanerusut suliariniarneqarput.
Tassami immap assingi maanna pigineqartut qanganisaavallaalersimapput ullutsinnilu sumiissusersiutinut GPS-inut naleqqukkunnaarsimallutik, taamalu ikkarluit nalunaarsorneqarnerat tutsuiginarpallaarunnaarsimalluni.
- Namminersorlutik Oqartussanik suleqatiginninnitsigut, Kalaallit Nunaata imartaani angalasartut avatangiisillu iluaqusissavavut. Ilaatigut ajunaarnissamut, inuit inuunerinik annaasaqarfiusinnaasumut avatangiisinullu mingutsitsiviusinnaasumut ulorianartorsiorneq annikillisinneqartussaammat, Troels Lund Poulsen oqarpoq.
Isumaqatigiissut aamma Jens B. Frederiksenimit nuannaarutigineqarpoq.
- Immap assinginik nutaanik peqalernitsigut, najukkani inuussutissarsiornermi innuttaasunillu angallassineq aamma isumannaannerulersussaavoq, Jens B. Frederiksen oqarpoq.
Kalaallit Nunaata Kitaani immap assinginik nutaanik piffissamut naleqqunnerusunik pilertortumillu suliaqarnissamut aningaasaliissutit saniatigut Danmarkimi Avatangiisinut ministeeriaqarfik 10 millionit koruuninik immikkut aningaasaliisuuvoq.
