Kissarsuummik taarsiineq CO2-mik aniatitsinermut millisaaqataassaaq

Jakob Poulsen Margrethe Sørensenilu 1990-ikkut aallartilaarneranni illumut pisoqalisumut iserterput, 1992-imilu kissarsuut uuliatortoq taarsertikkamikku 40.000 koruunneerlutik.

Nutaamik kiassaatitaartariaqalivimmat CO2-mik aniatitsinermut millisaaqataasussaq toqqarpaat, taamalu ukiuni arlalinni katersereerlutik 150.000 koruuneerlutik erngup nukissiorfimmit Utoqqarmiut Kangerluarsunnguaneersumik innaallagissamik kiassarnermut aasaq ikaarsaarput.

Nuummi illuinnarmi najugalik Jacob Poulsen ima oqarpoq.

- Qanoq akeqarsinnaanera siumut naatsorsukannersimavarput.

Radiatoritoqqat atatiinnarlugit oliefyri peerlugu innaallagiatortumik imermut kissaavimmik pilersimasinnaagaluarput, akikinnerusumik, kisianni....

- ...radiatorit nutaannginnermik assorujussuaq nuanniillinikuugamik, soorlu assersuutigalugu sinittarfitsinni angisuumik radiatoreqaraluarluni iluamik kissassinnaajunnaarnikuuvoq, radiatorit ilui sorujoqarnermik, Jacob Poulsen nassuiaavoq.

Isumaqalersimapput saliinnarlugit aaqqissinnaanngitsut.

- Taamaattumik arlaatigut pinngitsoorata radioatorit ruujorillu ilaat taarserartussaassagaluaratsigit, qularnanngitsumik aamma akisoorujussuussalluni, nangippoq.

Radiatorit innaallagissamik atuinerat pissutigalugu illup nilloriartortarnera oliefyreqarallarnermit sukkanerusumik maanna pisarpoq, ukiumoortumilli oliefyreqarnermut aningaasartuutit sipaarneqartussanngorput. Kiassaatit innaallagissamoortut ukiumoortumik misissortariaqassappat? aperaarput.

- Naamik, tassa taamaattussaanngilaq. Oliefyri atorallaratsigu kissarsuutaa ilaanneeriarluni ajutoortarpoq, anorersuartumilu qamittoortarluni.

Taamaakkaangat iluarsaassisussamik aggertititsisariaqartarput, aningaasartuutinut ilasaataasartumik.

- Naatsorsuutigivarput nalinginnaasumik ukiup ingerlanerani aningaasartuutit tamakkua atorunnaassasut, nangippoq.

Aserortoortoqassagaluarpat aserortup taarseriaannaasarnissaa aamma naatsorsuutigaat.

- Aamma pitsaaqutigigamiuk radiatorit ataasiakkaarlugit maanna ikissinnaagatsigit, arlaallu ajutuussagaluarpat sinneri tamarmik ingerlaannassapput, oqarpoq.

Oliefyri atorallaramikku pissutsit taamaanngillat.

- Oliefyri qamissagaanni taava illu tamaavissuat kissasserneqarunnaassagami, Jacob Poulsen oqarpoq.

Nuummi periarfissaqarneq qujamasuutigaa. Illoqarfiimmi tamarmik taama periarfissaqannginnamik.

- Periarfissap atorneratigut iliuuseqalaasimalluta misigivugut, naak uagut pisuutiginngikkaluaripput. Nunatsinni aqutsisut suliaasigut periarfissaqalersimavugut uuliatunngitsumik sarfamilli kiassarnermik atuisinnaanngorluta. Tanngassimaarnaqaaq, naggasiivoq.

Jacob Poulsenip nuliatalu Margrethe Sørensenip oqaatigaat, sarfatortumik kiassaateqalernermikkut pitsaaqutit ilagigaat radiatorit iikkamit aqqariaannaanerat eqqiaanermut qalipaanermullu iluaqutaanerat. Kissarsuutip uuliatortup radioatoritoqqallu piiarneri, nutaamillu radiatorilersortinneq sapaatip-akunnerata ataatsip missaanni suliarineqarput.

Nunatsinni kissarsuutit uuliatortut 6.000-t taarsersornerisa 400 millioni koruunit missaanni akeqarnissaat, Namminersorlutik Oqartussat nalunaarusiaanni eqqoriarneqarpoq. Taarsersorneqarpata CO2-mik aniatitsineq ukiumut 40.000 tonsinik milleriassangatinneqarpoq, tassa Kalaallit Nunaat tamakkerlugu ukiumut aniatitap 6 procentia.