Kissaatit Orpiat meeqqanik nuannaartitsinissamut periarfisseeqqippoq

Kissaatit Orpiat Nuummut ullumi utissaaq. Nuummi innuttaasut meeqqanut juullimi tunissutisiassaaleqisunut juullimilu qiimmassarneqarnissaminnik pisariaqartitsisunut tunissuteqarnissaminnut kingumut periarfissaqalerput.

Allattoq Laura Aggernæs

decembarip 10-at 2014 10:42

Nutserisoq Simon Uldum -

Meeqqat inuusuttuaqqallu illoqarfimmi meeqqat angerlarsimaffiineersut 100-200 koruunit missaannik akilimmik juullimi tunissutissarsissagaluarunik sunik kissaateqarnerlutik aperineqarsimapput.

Kissaatigisaallu juullimi uummataasanut Nuummi eqqumiitsuliortunngorniarfimmi Iluliaaqqami ilinniartunit suliarineqarsimasunut allattorneqarsimapput. Uummataasallu orpiliamut Nuuk Centerip tummerarsuisa ingerlaartut eqqaanniittumut pinnersaatitut nivinngarneqarsimapput.

Ullumimiillu uummataasamik kissaatigisamik allattuiffigineqarsimasumik aallertoqarsinnaavoq pisiniarfimmullu Baby Samimut tunniullugu.

Taamaaliornikkut inuusuttunnguamut juullimi pilluarnermik tunisisoqarlunilu nuannersumik misigisaqartitsisoqarsinnaavoq, Kissaatit Orpiannik aaqqissuisut tusagassiorfinnut nalunaaruteqarlutik taama allapput.

Aamma atuaruk Pisariaqartitsisunut tunissuteqarit

Meeqqat namminneq kissaataat

Meeqqat kissaatigisaminnik uummataasanut allattuisimasut ilaat Nuummi meeqqat angerlarsimaffiannit Meeqqat Illuanneersuupput.

Tassanilu sulisuuvoq immikkoortortami pisortaq Malene Hansen, taassumalu aaqqissuussineq aqqutigalugu meeqqat tunissutisiassaqartinneqartarnertik nuannaarutigisaqigaat malugisimallugu oqaatigaa.

- Uatsinnit juullimi tunissutisisarput, ilaallu aamma ilaquttaminnit. Kisianni tassa allaanngilaq juullip inngilinngua angalalluni nuannaarnermik siammartereqataasoq, Malene Hansen oqaluttuarpoq.

Kissaatit Orpiata immikkuullarissuunera aamma oqaatigaa, meeqqammi kissaatigisimanngisaminnik tunissutissarsinatik kissaatigisaminnik tunissutissarsisarmata.

- Kissaatit Orpiata pitsaaqutigaa, meeqqat namminneq kissaatigisaminnik tunissutissarsisarnerat. Atuakkamik tunineqaannaratik eqqarsarlutillu: "Sooruna atuakkamik tunineqartunga?'. Cd-mik imaluunniit arsartartut FC Barcelonakkut tujuuluaraannik kissaatigisimasaminnik tunineqaraangamik assut nuannaartarput, Malene Hansen oqarpoq.

Nuummi Kissaatit Orpiat Nini Almgren-Jensenimit 2010-mi aallarnerneqarpoq. Tunissutisiassanillu agguaassineq ukiormanna decembarip 22-ani pissaaq.

Kissaatit Orpiannik aaqqissuisut facebookimi quppernerat uani takuuk