Pisariaqartitsisunut tunissuteqarit
Meeqqat pissarissaanngitsut matumani poortukkanik pitsinneqarsinnaanissaat anguniagaavoq, meeqqallu ulloq unnuarlu angerlarsimaffinniittut 77-it siorna poortugarsillutik.
Atisaarniarfik Zuuki Duuki, Nuuk Centerip sammisassaqartitsivia aamma Pikkori Sport, Nuummi orpiliaq kissaatinik nivinngaavigineqarsinnaasoq aningaasaleeqataaffigaat:
- Nuummi suliffeqarfiit tapersersuinerat nuannaarutigeqaarput, meeqqallu pisariaqartitaannik inuit pingaartitsinerat aamma nuannaarutigeqalutigu. Tunissutisiarerusutat allattorsimaffianni atinik taamaammat allattuinngilagut, kikkullu tunissuteqarfigineqarnissaat inuit ikittuinnaat nalunngilaat, Lasse Nymand oqarpoq.
Orpiliaq kissaatinik nivinngaavigineqarsinnaasoq Nuuk Centerimi 1.salimi takuniarneqarsinnaassaaq, tunissutiginiarneqartullu Boteximut tunniunneqarsinnaallutik.