Kisitsisit nutaat: Aalisarneq siuariartorfiuvoq
2013-imi saarullinnik pisaqartoqarpianngitsoq maanna pisat amerliarujussuarsimapput. 2013-imi qaammatini siullerni sisamani pisat 1000 tonsit missaanniipput, ukioq mannalu piffissami tassani saarullinnik pisat 5000 tonsingajaallutik.
Qaleralittassanulli saarullittassanullu tunngatillugu, uumassusilinnik ilisimatuut kaammattuutigisaat tunngavigalugit taakku aalajangersarneqartarput.
Raajarniarneq aamma ingerlalluaqqilerpoq. Naluneqanngitsutut, siorna raajarniarneq ukiut siuliinut naleqqiullugu annertugisassaasimanngilaq. Tamatumunnga atatillugu pingaarpoq oqaatigisallugu raajat akiisa qaffasinnerunerisa nunatta karsianit iluanaarutaanerat ukiut siuliini pisanut amerlanerusunut naleqqiullugu aamma assinganik pissarsiaqarfiusimammat.
Ukioq manna raajartassiissutigineqartut uumassusilinnik ilisimatuut kaammattuutigisaat najoqqutaralugit qaffakkiartortinneqarput, taamaattumillu aalisarnermik inuussutissarsiuteqartunit nunattalu karsianut tunngatillugu raajanik pisat amerlanerunerisa akigissaarnerunerisalu suli pitsaanerusumik angusaqarnissamut neriulluarfigineqarpoq.
Najoqqutarisaq: Naatsorsueqqissaartarfik