Kishima misigissutsit pillugit erinarsorpoq
Isumaqaruit nipaa tukappalulaartoq nersualaarinertut tiguneqarumaarpoq. Eqqartorparput Kishimap cd-liaa nutaaq "Timmiaaqqatut". Taanna torrutiinnarlugu nipilersornikkut immiussaavoq taamaallaat atasiakkaarinerit erinarsornerillu ilaqqissinnarlugit naqiterneqarsimalluni.
Henrik Høyer Jensenip aamma isertuutinngilaa The Beatles-ikkunnik nuannarinnittunutn ilaagami taakku peruttuleramik Apple Road-imi torrutiinnarlugu immiussisarsimagamik.
- Pimoorutigivillugu qaammatit pingasut sungiusarpugut sapaatip akunneralu ataasiinnaq atorlugu immiussilluta, Henrik Høyer Jensen KNRimut immiussartik immaqa tukappalulaarsinnaasoq pillugu oqarpoq.
Cd "Timmiaaqqatut" Atlantic Music aqqutigalugu saqqummerpoq taakkulu aamma saqqummersitsisuupput Kishima siulleq 2004-mi saqqummermat, taamanikkullu pilersaarutaagaluarpoq tullia ukiut pingasut ingerlaneranni saqqummissasoq. Ukiulli arfineq marluk ingerlapallareersimapput ukiullu kingulliit Kishima tusarnaartitsisuni akuuallaarsimanngilaq.
- Piffissaq ilinniagaqarninnut atorsimavara. Kisianni nipilersorpallaanngikkaluarlunga piffissap ingerlanerani isumassarsianik katersiuarsimavunga, tamannalu taallani malunnannguatsiarpoq, Henrik Høyer Jensen oqarpoq.
Imminut toqunneq naaggaarpaat
Nunatsinni inuusuttorpassuit allat assigalugit misigisarsimavaa ikinngutit qanigisat imminnut toqunnerat. Tamannalu erinarsuummi "Tunniussatit"-mi eqqartorneqarpoq.
- Taamanikkut ikinngutigiit ammalortunngoriarluta assammilluta isumaqatigiippugut ikinngutigiit akornannitsinni imminortoqaqqissanngitsoq aammalu nukittuniarluta. Suli taakkuulluta ullumikkut maaniippugut, Henrik Høyer Jensen qungujulluni oqarpoq.
Erinarsuummi eqqartorpaa ammaffigeqatigiinnissaq aammalu imminut toqunnissamik eqqarsalersimagaanni ilaquttat eqqarsaatigineqartariaqartut.
Cd saqqummerpoq kalaallit inuusuttut atuakkianik saqqummersitsisannginnerat oqallisaaleruttortoq taamaanneranilu aarleqqutigineqarpoq oqaatsitta tammariartulernissaat. Kisianni Henrik Høyer Jensen akerlerluinnaanik isumaqarpoq.
"Nunarput persernerani pisuttarpugut isigisinnaasarluta. Sapinngilagut ilumoorpoq taanna".
- Assut nuannaarutigivara cd saqqummermat sammisap taassuma oqallisigineqaleruttorfiani. Neriuppunga erinarsuut una oqaatsit illersornissaannut kaammattuutitut tiguneqarumaartoq, Henrik Høyer Jensen oqarpoq.
Henrik Høyer Jensen erinarsuusiortarneq pillugu Kodap siorna pikkorissartitsinerani peqataavoq. Tassani ilaatigut sammineqarpoq oqaatsinik pinnguarsinnaaneq. Tamanna erinarsuutini arlalinni malunnallattaavoq.
Kishima immiussimmat peqataapput Henrik Høyer Jensen guitarerlunilu erinarsortoq, Martin Zinck tumerparpaartoq, Mikael Mortensen qatitoortoq, Malik Hegelund guitarertoq, Frederik Elsner ataasiakkaarisoq, Jacob Andersen aamma Knud Petersen tulleertut.
Suli nalunarallarpoq qaqugu Kishima nipilersoqqissanersoq. Tumerparpaartartoq nutaaq sungiusaqatigissamaarpaat qanittukkut Martin Zinck nalunaareersoq tumerparpaartartutut unikkallarluni.
