Kirkegaard aatsitassarsiornissamut takorluukkanik piviusorsiunngitsunik saqqummiussaqarpoq

-Ukiut tallimat qaangiuppata uuliasiorfinnik tunisassiorfiusunik peqalersimanissaa ilimaginngilarput, NunaOilip pisortaa, Hans Kristian Olsen, taama oqarpoq.

Aamma nalunaarusiami saqqummersinneqaqqammersumi 'Kalaallit Nunaannut iluaqutaaqqullugu'-mi ukiut 20-30-t qaangiuppata aatsaat uuliamik qalluisoqarsinnaassasoq tikkuarneqarpoq. Jens-Erik Kirkegaard Qanoruumut unnugu aallakaatinneqartussamut apersorneqarluni oqaatigaa NunaOilip pisortaata allaaserisani paatsoorsimagai.

Kingornali aaqqissuisoqarfimmut saaffiginnippoq nassuerutigalugu allaaserisamini allaqqasoq 'uuliasiorfiit tunisassiorfiusut marluk'.

-Naqinnerliuineruvoq, Jens-Erik Kirkegaard nassuiaavoq.

Naqinnerliuineq Jens-Erik Kirkegaardip Facebookimi quppernerani aamma nassaarineqarsinnaavoq, allaaserisanimi tamakkerlugu tassuuna saqqummersissimagamiuk. Kukkuneq ullumi ullup qeqqanut Facebookimi qupopernerani suli iluarsineqarsimanngilaq.

Aammattaaq piiaviit 5-10-t ukiut tallimat qaangiuppata ingerlalersimanissaat aatsitassarsiortut ilisarisinnaannginnerarpaat.

-Piiaavit marluk, iluatsitsisoqassappallu pingasut ingerlalersimanissaat ilimagaarput, NunaMineralsip pisortaa, Ole Christiansen, oqarpoq.

Taamatullu ilimagisaqartoqarnera nalunaarusiami Kalaallit Nunaannut iluaqutaaqqullugumi inerniliussanut naapertuuppoq. Piiaaviit 5-10-t ingerlalersimanissaat aamma aatsitassarsiorneq pillugu periusissami Jens-Erik Kirkegaardip tusarniaassutigisaani allaqqangilaq.

Tassanimi atuarneqarsinnaavoq piiaaviit ukiut tallimat qaangiuppata 3-5-iunissaat nalilerneqarpoq. Piffissarlu ungasinnerusoq eqqarsaatigalugu piiaaviit 5-10-t ingerlalersimanissaat ilimagineqarpoq. Jens-Erik Kirkegaardip aatsitassarsiorneq pillugu periusissarpiaq allaaserisamini innersuussutigigaluarpaa.

Jens-Erik Kirkegaardip apersorneqarnera Qanoruumi unnugu isiginnaarneqarsinnaavoq.