Kinguaassiuutitigut atornerlugaasimasunut atornerluisartunullu iliuuseqaqqusipput
Kinguaassiuutitigut atornerlunneqarsimasut siunnersorneqarumallutik Tasiortamut 141-mut saaffiginnissimasut katillugit 108-sut, ippassaq radioaviisimi tusarliupparput. Kisitsisit takutippaat kinguaassiuutitigut atornerlunneqarsimasut suli sullinneqartariaqartut.
Taamatuttaaq Paamiuni kinguaassiuutitigut atornerlunneqarsimasut peqatigiiffiat 'Kialaaq' isumaqarluinnarput. Taakku sapaatip-akunneri marluk matuma siorna, Peqqissutsimut naalakkersuisoq Agathe Fontainip tikeraarneranut atatillugu, akerliussutsimik takutitsiffigaat.
- Atukkagut massakkut naammaginarunnaarmata akerliussutsimik takutitsivugut. Kinguaassiuutitigut atornerluisarnermut tunngatillugu ukiorpassuit sorsunniaraluarluta annertunerusumik kinguneqarneq ajormat, qinikkut nutaat suna suliassatut pingaarnerpaatut tigusariaqaraat ilisimaniassammassuk. Tassa katsorsaavittaarnissaq minnerunngitsumillu atornerluisartut isertitsivimmiit anigatik katsorneqaqqaartarnissaat pisariaqarpoq, massakkummi nalunngilarput pineqaatissinneqarnertik naammassinaguluunniit misiligummik iperagaasarput. Kisianni eqqorneqartut annertunerusumik sullinneqaratik, taama oqarpoq Kialaami siulittaasoq Isak Josenius Thorsen.
Kialaaq siorna novembarimi pilersinneqarmalli ilaasortat maanna 60-it sinnereersimalerpaat. Ilaasortat kinguaassiuutitigut atornerlunneqarnertik pillugu misigisimasaminnik oqaluttuartarnerat amerliartornerat aallaavigalugu, katsorneqarnissamik pisariaqartitsineq annertusiartorpoq.
- Killiffipput naammagisimaarunnaarparput, pissutigalugu annaasartakkagut toqukkut qimaguttartut imminortartullu amerliartuaaginnavimmata. Taakku pissutsit akuerisinnaanngilagut. Uaguttaaq misigissutsitigut nakkarujussuaraangatta ilaannikkooriarluta inuuneq taanna atortarparput, Isak Josenius Thorsen oqarpoq.
Taanna Tasiortap siulittaasuanit Arnaq Grønvoldimit taperserneqarpoq, Naalakkersuisunngortut eqqugaasunut sullissinerup katsorsaanerullu annertusarnissaa pitsanngorsarneqarnissaalu siunertaralugu suleqatiginissaat qilanaarimmassuk.
