Eqqumiitsuliortoq: Kinguaassiutitigut kannguttaatsuliornerit unitsinneqarnissaat politikerit akisussaaffigaat

Meeqqanut kinguaassiutitigut kannguttaatsuliortoqartarnerata akiorniarneqarnerani politikerit nangaagunik qinersinermi tullermi sakkortuumik pillarneqassapput. Eqqumiitsuliortoq Gukki Nuka taama isumaqarpoq.

Aviisimi Jyllands-Postenimi oqallissaaruteqarluni allaaserisamini innuttaasut, suliniaqatigiiffiit tusagassiuutillu nersualaarpai meeqqat kannguttaatsuliorfigineqartarnerisa akiorniarneqarnerata eqeersimaartumik peqataaffigineqarneranut. Akiuiniarnelu innuttaasunit tamanit soqutigineqarluni peqataaffigineqarsoraa.

Gukki Nuka 14-inik ukioqarluni illoqarfigisamini taamani isikkamik arsarnermi sungiusaasuminit tarnikkut malersugaavoq peqqarniitsumillu pinngitsaalineqarluni. Taamatullu pisoqarsimanera isertuuppaa ukiullu 30-t sinnerlugit qaangiummata aatsaat oqaluttuaralugu sassarpoq.

AAMMA ATUARUK Isummaminnik nittarsaasut meeqqanik atornerluisarneq ukkatareqquaat

Gukki Nukap kannguttaatsuliorfigineqartarsimanini eqqumiitsuliornermigut imminut suliarivoq kinguaassiutitigullu kannguttaatsuliortoqartarnerata akiorniarneqarnera eqeersimaartumik peqataaffigalugu.

Taanna isumaqarpoq innuttaasut akornanni oqallinnermi annertuumik siuariartoqarsimasoq. Politikerilli pineqartumi suli annertuumik akisussaaffeqartut, taama allappoq.

AAMMA ATUARUK Nakuusa kinguaassiutitigut atornerluisarneq akiorniarlugu suliniummik saqqummersitsisoq

- Politikerit akiuiniarnermi siuttuunissaat piumasaqaatigaara. Ernumarpasinneq naammanngilaq - politikerit iliuuseqartariaqarput. Aamma naammaginartumik iliuuseqanngikkunik qinersisartut qinersinermi tullermi tamatumunnga pillaajumaarput. Innuttaasunit tamanit peqataaffigineqartumik suliniutigineqartuni taama pisoqartarpoq - piareersartarput. Politikerit nangaagunik sakkortuumik pillagaajumaarput.