Kinguaap tulluusimaartup Qivittoq takoqqippaa

Qallunaat kalaallillu filmiliaat "Qivittoq" Københavnimi filmertarfissuarmi Paladsimi ippassaq takutinneqarpoq, isiginnaariartunillu ulikkaarpoq.

"Qivittoq" ukiut 55-it matuma siornatigut takuteqqaarneqarmat inimi pineqartumi taamanikkut aamma takuteqqaarneqarpoq.

Filmi "Qivittoq" ukiut ingerlaneranni piumaneqarsimaqaaq, filmilianilli saqqummersitsisartut Nordisk Film filmi iluarsaateqqammerpaat, DVD-tullu saqqummersillugu.

Kalaaleq Niels Platou inuttani kalaaliusuni pingaarnersaavoq, erneralu Kunuik Platou, titartakkanik filmilianik ilitsersuisuujutigisoq, isiginnaariartunut ilaavoq, suleqatittalu Martine Lind Krebsip naapissimavaa:

- Ataataga Saqqami taamanikkut ilinniartitsisuuvoq, "Qivittumullu" kalaallinik inuttassarsiornermi Poul Reichhardt umiarsuarmut ilaasimavoq, Saqqamullu tikikkamik ataataga nassaarisimavaat, Kunuk Platou oqarpoq.

Filmiliorniat Saqqamut 1955-imi apuummata, Saqqami najugallit tupigusoqaat, taamaattunimmi takusimanngisaannarput.

Filmimi inuttassat katersortarfimmi unnuk taanna misilittarneqarput.

Niels Platou Saqqami ilinniartitsisuuvoq. Taanna piniartutut Paaviatut inuttaavoq, Saqqamilu aalisartuni siullersaajorusulluni.

Saqqami innuttaasut naammaataallutik isiginnaartitsisuupput, filmiliornerillu pillugit oqaluttuat Kunuk Platoup peroriartornermini tusartuartarsimavai:

- Misigisaminik meeraalluta oqaluttuuttarpaatigut. Assersuutigalugu palasimut 1956-imi takuteqqaarneqarsimavoq, oqaluttuaatullu misigivara. Filmertarfimmi inimi maani takuteqqaarneqarsimanera maannalu aamma tassanerpiaq takuteqqinneqarnerani ilaasinnaanera assorsuaq attortinnartutut misigaara, Kunuk Platou oqarpoq.

Filmi "Qivittoq" qallunaap kalaalerlu ikinngutigiinnerannik oqaluttualiaavoq, taakkulu arnanut asannilerfigisaminnut ajornartorsiuteqarput. Kanngutsatsitaanerup kinguneranik Pavia nunaqarfitsik qimallugu qivippoq. Niuertorusiusulli Poul Reichhardtimit inuttaaffigineqartup malillugu unissarpaa. Pissanganartorsiorneq Torsukattammi, ullutsinni qaleralinniarfigineqartartumi, qaannamik, pujortuleeqqamik sermikkullu malersuunnermik pisoqarfiuvoq. Pavia naggataatigut angerlarpoq nunaqarfimminni tikilluaqqulluarneqarluni.

Filmi Kalaallit Nunaata nunasiaataasimaneranut kingumut qiviarneruvoq, aalisarnerup inuussutissatut aallarnisaleruttorfianut aamma tunngalluni.

Filmimi ilitsersuisup Erik Ballingip kalaallinik nuannarinnippasissumik takutitsiniarsarinera ersarikkaluartoq pissutsit maanna allaanerujussuusut filmimi takuneqarsinnaalersimavoq.

Niels Platou filmimi pingaarutilittut inissisimagaluartoq filmimut tunngatilugu allagartani aqqa taamanikkut ilaatinneqanngilaq.

- Pissutsit taamanikkut allaanerujussuupput, ineriartortoqarsimaneralu nuannaarutiginnassavarput, Kunuk Platou oqarpoq, filmillu sunniuteqarsimanera pillugu ima oqarluni:

- Filmi filminik soqutigisaqalerninnut pissutaaqataavoq. Ataatagigaluara meeraallunga qummut isigisorujussuuara. Filmi una pisuulluinnarluni Filmskolemi ilinniarnikuuvunga, animationsinstruktøritullu naammassinikuullunga. Filmi una pissutaalluni ataatama filmip siluarsuaanut pulatinnikuuaanga, Kunuk Platou oqarpoq.

Poul Reichhardt aamma Astrid Villaume Niels Platoup saniatigut pingaarnertut inuttaapput.

Filmi qallunaat filmiliaanni siullersaalluni Oscarinnassinnaasussatut taamanikkut innersuunneqarpoq, qallunaallu filmiliaanni taamanikkut aamma akisunerpaalluni.

"Qivittoq" DVD-nngorlugu maanna pisiarineqarsinnaalereerpoq, internetikkullu nittartakkatigut ilaatigut pisiarineqarsinnaalereerluni.