Kingornussinissamut pisinnaatitaaffiit pillugit inatsit Folketingimit akuersaarneqarpoq
- Inatsimmut allannguutissaq tulluartoq, Socialdemokraatit oqarput. - kingusissoorneq pinngitsoornermit ajunnginneruvoq, Radikale Venstre oqarput. - Qitornaasut kimit kingoqqisuullutik paasisinnaasariaqarpaat, Dansk Folkeparti oqarpoq. Naleqqutinngitsuliorneq sivisuallaamik atuussimasoq, SF-imit aamma oqaatigineqarpoq.
Inatsimmut allannguutissatut siunnersuut, inatsisitigut ataataqanngitsut kingornussisinnaanermut pisinnaatitaaffiinik qulakkeerisussaq Folketingimi siullermeerneqarmat tapersersorneqarluarpoq. Inatsit uersakkat 1963 sioqqullugu inunngorsimasut ataatassarsiornissaminnut taamatullu kingornussinissaminnik piumasaqaateqarnissaminnut pisinnaatitsinngitsoq taamaalilluni iluarsineqarpoq.
Men IA’s Johan Lund Olsenilli IA-meersup suli aaqqinniagassaqarsoraa:
- Inatsisissatut siunnersuut iluaraarput, kisianni inatsisitigut ataataqanngitsut toqoreersimasumut qitornaasut immikkoortinneqalernerannik nutaamik pilersitsivoq. Toqusummi pigisai naatsorsorneqareersimappata kingornussinissaminnik pisinnaatitaassanngillat. Taamaammat Kalaallit Nunaannut tunngasunut ataatsimiititaliamut erseqqissaatigaara apeqqut taanna isornartorsiuisinnaassuseqartumik eqqumaffigineqartariaqartoq.
Inatsisartut inatsisissatut siunnersuut siullermeereerpaat, taamanilu aamma tapersersorneqarluarluni. Nunatsinnili partiit Johan Lund Olsen assingalugu toqoreersimasumut qitornaasut taartisiaqartinneqarnissaannik aamma isumaqarput.
-Inuttut Pisinnaatitaaffiit pillugit Institutti tusarniaarnermi akissuteqarsimavoq, tassanilu allassimavoq europami inuttut pisinnaatitaaffiit pillugit isumaqatigiissummik kingumut unioqqutitsisoqassasoq, tamannalu akuerineqarsinnaanngilluinnarpoq, Johan Lund Olsen oqarpoq.
Doris Jakobsen Siumumeesoq uranimut akuersaanngilluinnarnerup Inatsisartuni suliarineqarneranut peqataaniarluni suliap Folketingimi suliarineqarnerani peqataanngilaq.
Inatsisitigut ataataqanngitsut pillugit siunnersuut siullermeerneqareerluni Kalaallit Nunaannut tunngasunut ataatsimiititaliamut ingerlateqqinneqarpoq. Inatsisartunili naammassillugu suliarineqartinnagu akuersissutigineqarsinnaanngilaq. Tamannalu novembarip 27-iani pissaaq.
