Kinamiut Ironbarkimut aningaasalersueqataarusuttut
Aatsitassarsiortitseqatigiiffik, Ironbark Zink Limited, Citronen Fjordimi aatsitassanik piiaanissamik akuersissummik aatsitassanut naalakkersuisoqarfimmit tallimanngormat tunineqarpoq.
Pilersaarutilli piviusunngortinnissaanut aqqut suli takeqaaq.
- 2017 uagutsinnut ulapiffiussaaq, Ironbarkimi pisortaq Jonathan Downes oqarpoq.
AAMMA ATUARUK Ironbark Citronen Fjordimi aatsitassarsiornissamik akuersissummik tunineqartoq
Isumaqatigiissummi naapertorlugu Tunup avannaarsuani Citronen Fjordimi zinkimik aqerlumillu piiaanermi aningaasartuutit 2,7 milliardit koruuniniunissaat missingersorneqarpoq.
Aningaasalersuerusuttut
Kinamiut aatsitassarsiortitseqatigiiffissuat aningaasalersueqataassasoq, pisortaq nassuiaavoq, taakkua aningaasalersuinissamut patajaatsumik siunnersuutissaqartut unnerlugit.
- Kinami sanaartornermik suliffeqarfissuaq isumaqatigiissuteqarfigereerpagut sulili atsiorata. Taakku nunani assigiinngitsuni aatsitassarsiortuupput. Taakkualu soqutigaavut soqutigisagut naammassiniarsinnaammatigit, Jonathan Downes oqarpoq.
AAMMA ATUARUK "Citronen" kinamiut suliffeqarfiannik isumaqatigiissuteqarpoq
Kinami suliffeqarfiup, piginneqatigiiffiup China Non-Ferrous Metal Miningip ataaniittup, suleqatigiinnissamik 2014-imi isumaqatigiissuteqarfigineqartoq, Ironbarkip oqaatigereerpaa. Suliffeqarfiup sanaartornermi aningaasaliissutissat 70 procentii qulakkiissagai piginneqataassutillu 20 procentiinik piginnittuulernissamut periarfissaqassasoq, taamani oqaatigineqarpoq.
Pisortaq: Neriuutigaarput 2018-imi sanaartulissalluta
Ironbarkip aamma piaanissamut matusinissamullu pilersaarummik Naalakkersuisunut isumaqatiginninniaqqaassaaq.
Aatsitassanut pisortaqarfik naapertorlugu suliat taakkua ukiup ataatsip missaani suliarineqassapput, Jonathan Downesilu aamma taamatut ilimasuppoq.
- Neriuutigaarput 2018-imi sanaartulissalluta, Downes oqarpoq.
AAMMA ATUARUK Ironbarkip royaltymik akiliisussaannginnini aalajangiusimaannarpaa
Ironbarkip ilanngullugu oqaatigereerpaa aatsitassanik piiaanermi akitsuummik Royaltiesinik Nunatta karsianut akiliuteqarniarnani.
Kisianni piiaanissamut akuersissummi erseqqissarneqarpoq, piginneqatigiiffik royaltiinik akileraassasoq, zinkimik aqerlumillu tuniseqqaarnermi kaaviiaartitat 1 procentiannik aallartittumik, taava piiaalernermit ukiut tallimat qaangiuppata kaaviiaartitat 2,5 procentiannik akilerassalluni.
