Kinap Danmarkimi aallartitaa nunatsiippoq
Naalakkersuisut Siulittaasuata Kim Kielsenip aallartitap nunatsinni paasisassarsiorneranut atatillugu Nuup Kangerluani Qooqqunut angalaaqatigaa, aallartitap nunatsinni asi misiginiassammagu pisussanillu allaanerulaartumik misigisaqarniassammat.
Namminersorlutik Oqartussat tusagassiuutinut nalunaarutaat naapertorlugu angalaarnermi ataatsimiittoqanngilaq.
Kim Kielsenilli iluatsitsilluni aallartitaq Naalakkersuisut Kinamut niuffateqatissarsiorlutik 2017-imi ukiakkut angalanissaannut piareersarnermi suleqatigiissimanermut qutsavigaa.
AAMMA ATUARUK Kineserit aarleqqutigigaat
Mittarfiliortiternissat paasissutissiissutigigai
Allartitap Nuummi, Ilulissani, Qaqortumilu mittarfiliortiternissamik sulineq apersuutigaa. Kielsenip taamaammat aallartitaq tamatuminnga paasissutissippaa, oqaatigalugulu sanaartornissamut inatsisissatut Naalakkersuisut siunnersuutaat Inatsisartut aningaasaqarnermut akileraartarnermullu ataatsimiititaliaanit maanna suliarineqartoq.
Kinamiut suliffeqarfiutaat mittarfiit pingasut sanaartornissaannut neqeroornissamut siumoortumik piukkunneqarpoq.
Kinap aallartitaa nutatsinniinnermini Kinamiut filmiliaat pillugit festivaleqarnissaannik aaqqissuivoq. Taamaaliorneq Namminersorlutik Oqartussanik Katuamillu suleqateqarluni pivoq.
Aaqqissuussaq taanna Nuummi aggustip arfineq aappaani arfineq pingajuanilu pivoq, Sisimiuni aggustip qulingiluaani Ilulissanilu aggustip aqqarnani.