Kinamiut sulisorinissaat avaqqunneqarsinnaanngissoraa

- Alumiiniumik aatsitsivimmik aamma erngup nukinganik nukissiorfinnik marlunnik pilersitsiniarnermi, kalaallit sulisartut akissarsiatigut isumaqatigiissuteqarfiginerisigut sulisorinissaat kissaatiginartikkaluarpara. Tamannali piviusorsiortuunngilaq, Ove Karl Berthelsen allappoq.

Nangillunilu:

- Toqqartuiinnarluta suliassanik naammassinninniarsinnaanngilagut, akornutaasinnaasulli minnerpaaffianniitinniarsariitigalugit - iluaqutaasinnaasut nukittorsartariaqarpavut. Assersuutigalugu taamaallaat suliassap pilersinniarnerani avataaneersunik akissarsiakitsunik qanoq atuisinnaanissarput misissuiffigaarput.

Ove Karl Berthelsen taamatut oqaaseqaateqarpoq, aviisimi Berlingske Business-imi marsip 21-anni saqqummersumi allaaserinnittoqarmat qulequtserlugu "Kalaallit Nunaat Kinamiunit tigusarineqalersoq".

Kiinamiunik akissarsiakitsunik sulisoqarsinnaanissani Alcoap Naalakkersuisunut piumasaqaatigereerpaa, tamannami suliffeqarfiup aningaasartuutaanut angisuumik millisaataassammat. Alcoa taamaaliornissaminut akuerineqanngikkuni pilersaarutini nunamut allamut nuunniarlugu oqaatigereerpaa.

Sulisartulli kattuffiisa maaniittut akikitsunik sulisoqarnissaq sakkortuumik akerlilersorpaat, kalaallillu sulisartoqarnikkut isumaqatigiissutaasa malinneqarnissaat piumasaralugu, tassami Kinamiunik akissarsiakitsunik atuinikkut sulisut akissarsiaat allatigut appariaateqarsinnaammata.

Taamaattorli Ove Karl Berthelsen oqaaseqaammini allappoq, suliniutip pilersinniarneqarnerani aamma pilersinneqareerneratigut kalaallinik isumaqatigiissutit naapertorlugit sulisoqarnissaq anguniarneqartoq.