Kinamiut sulisartuinik tikitsisoqassappat Folketingi immikkut inatsisilioqqaartariaqassaaq

Inatsisinik atortitsinermut ministeriaqarfiup suliniutit angisuut pillugit inatsimmut nutaamut tusarniaanermi akissuteqarluni naliliinera malillugu, sulisartunut atugassarititaasut najugaqarnissamut sulinissamullu akuersissuteqartarnermi atugassarititaasunit allaanerupput. Kalaallit Nunaatalu allamiunut akisussaaffeqarfik suli tigusimanngimmagu, Kalaallit Nunaanni suliniutit angisuut pillugit inatsit danskit nutaamik inatsisiliortinnagit atorsinnaanngilaq.

Konservativet siulittaasuat Lars Barfoed aviisimut ullormut saqqummersartumut Informationimut ullumi oqarpoq kalaallit kissaataat soorunami tusaaniarneqassasut, inatsisilli imarisaa tigussaasumik isummerfigineqartinnagu imaaliinnarluni akuerineqarnavianngitsoq.

Nunani tamalaani politikkikkut pissutsit pingaarnerisut aamma eqqumaffisariaqassavagut, oqarpoq.

Lars Barfoedip inatsisissatut siunnersuut suli atuarsimanngilaa, Venstreli Dansk Folkepartiilu assingalugit annaassiniarnermut, peqqinnissaqafimmut, politeeqarnermut eqqartuussiveqanermullu danskit naalagaaffianut qanoq aningaasartuuteqarnerulersitsissanersoq paasissallugu soqutigisupilussuuaa.

- Danskit naalagaaffianut aningaasartuuteqarnerulersitsinnginnissaa qulakkeertariaqarparput, Lars Barfoed oqarpoq, taassuma aamma naatsorsuutiginngisamik pisoqassagaluarpat atorneqartussamik inatsimmi immikkut piumasaqaasiortoqarnissaa siunnersuutigaa.

Kalaallit Nunaata sulisartunik allamiunik piffissami killilimmi tikisitsinissaa Socialdemokratit akornuserusunngilaat, Kalaallit Nunaannu tunngasunut oqaaseqartatoq Flemming Møller Sørensen oqarpoq. Inatsit  nunat tamat suliffeqarnermut suliniaqatigiiffiata aajanagersagaanik naammassineqarsimatillugit pissutsit isorineqarsinnaasut akuliuffigerusunngilai

-Kalaallit tamakku susassaqarfigaat, oqarpoq.

Danskilli politikeriisa sunarpiaq pineqarnersoq erseqqissumillu akissuteqarfigineqarnissaq Namminersorlutik Oqartussanut piumasaqaatigisariaqarpaat, Enhedslistenip Kalaallit Nunaat pillugu oqaaseqartartua Finn Sørensen isumaqarpoq.

- Allamiut pillugit politikki Naalagaaffeqatigiinni aalajangersarneqatussaatillugu taamaaliortariaqalersinnaavugut. Suna tunngavigalugu akuersissanerluta itigartitsissanerlutaluunniit ilisimasariaqarparput. Politikkikkut akisussaaffik Kalaallit Nunaannut asuli tunniutiinnarsinnaanngilarput, oqarpoq.