Kinamiut suliartortitat Danmarkimut imaaliallaannaq angalasinnaatitaassanngillat
Inatsisinik atortitsinermut ministeriaqarfik taama Søren Espersenip Dansk Folkepartimeersup apeqqutaanut akissuteqarpoq.
Kinamiut sulisartut Kalaallit Nunaanni aatsitassanik piiaasoqalissagaluarpat suliartortinneqartussat Savalimmiunut Danmarkimulluunniit angalasinnaatitaassanersut Søren Espersenip paaserusussimavaa.
Imaaliallaannarli taamaaliorsinnaatitaassanngitsut, Inatsisinik atortitsinermut ministeriaqarfimmit paasissutissiissutigineqarpoq.
Ministeriaqarfik Kalaallit Nunaanni suliniutinut angisuunut tunngatillugu allamiut pillugit inatsimmut malittarisassanik tapiliussassat pillugit siunnersuuteqangajalerpoq. Inatsit nunamut tikinnermi aallarnermilu nakkutilliineq pillugu aalajangersakkanik aamma imaqassaaq, ministeriaqarfik Søren Espersenimut ilaatigut akissuteqarpoq. Inatsisissatut siunnersuut qaammatip tulliani saqqummiunneqassangatinneqarpoq.
Søren Espersen Folketingimullu ilaasortat arlallit allat kalaallit suliniutinut angisuunut inatsisaannut aatsitassarsiornermilu danskit oqartussaasuisa akisussaaffeqarfigisaannut tunngatillugu danskit ministeriaqarfiinut assigiinngitsunut apeqquterpassuarnik tunniussaqarsimapput.
