Kinamiu Finlandimut angalasoq coronavirusimik tunillatsissimasoq
Tv-qarfik, Yle, naapertorlugu Finlandimi peqqinnissamut atugarissaarnissamullu misissuisoqarfik, THL, taama nalunaaruteqarpoq.
Nappaammik tunillatsissimasoq kinamiut illoqarfissuanit, Wuhanimeersuuvoq, taanna Laplandimi qitiusumik napparsimmavimmi maanna mattussaaqqavoq.
- Virusip Finlandimut takornariat aqqutigalugit anngunnissaa ilimagineqarpoq. Virusip Finlandimi siaruaannissaanut aarlerinarnera suli annikippoq, taamaammat eqqissiviilliortoqalernissaanut pissutissaqanngilaq, Mika Salminen Yle-mut oqarpoq.
Nunani Avannarlerni virusimik napparsimasumik aatsaat uppernarsaasoqarpoq.
AAMMA ATUARUK British Airwaysip Kinamut timmisartuussisarnerminik taamaatitsigallartoq
- Laplandimut anngunnera ajuusaarnarpoq, ilimagineqareersinnaasimassasorli, THL-imi nappaatinut tuniluuttunut akiuussutissanullu immikkoortortami pisortaq, Taneli Puumalainen, tusagassiortunik pingasunngornermi unnukkut katersortitsinermi oqarpoq.
Finlandimi inuit katillugit 15-it coronavirusimik napparsimalersimasinnaanermik misissorneqarput.
Nunarsuat tamakkerlugu peqqinnissaq pillugu suliniaqatigiiffimmit, WHO-mit ataatsimiititaliap coronavirus nunat tamalaat akornanni peqqinnissamut aarlerinartorsiortitsinersoq sisamanngornermi ataatsimiinnermini naliliiffigissavaa.
WHO taama paasissutissiisoq nutaarsiassaqartitsivik, Reuters allappoq. Ataatsimiititaliaq sapaatip akunnerata ataatsip ingerlanerani pingajussaanik ataatsimiilerpoq.
AAMMA ATUARUK Coronavirusimik Kinami toqquteqartut 100-nit amerlanerulertut
Coronavirusip akiorniarneranut “Kinap sutigut tamatigut suliniuteqarnera”, WHO-mit oqaaseqartartup, Mike Ryanip nersuarinnissutigaa.
- Immikkuullarilluinnartumik unammillissuteqarnerminni immikkuullarilluinnartumik alloriarput, WHO-p oqaaseqartartua oqartoq Reuters allappoq.
Kinami virusimik tunillatsissimasut maanna 5900-init amerlanerupput. Inuillu 132-t nualluummik toqussuteqarlutik.
/ritzau/